જામજોધપુરની પાંચયારી સીમમાં જાહેરમાં જુગાર ચાલતો હોવાની બાતમીના આધારે પોલીસે દરોડો પાડતા ચાર શખ્સો ઝડપાયા હતા જયારે નવ શખસો નાસી છૂટ્યા હતા. પોલીસે દરોડા દરમિયાન અડધા લાખની રોકડ, 12 મોટર સાઇકલ મળી 3,71,200નો મુદામાલ કબ્જે કરી કાર્યવાહી કરી છે.

પોલીસ સૂત્રોની માહિતી મુજબ જામજોધપુર પોલીસ મથકનો સ્ટાફ પેટ્રોલીંગમાં હતો ત્યારે ચોક્કસ બાતમી મળી હતી કે, પાંચયારી ગામની સીમમાં લાઈટના અંજવાળે જાહેરમાં કેટલાક શખસો ગોળ કુંડાળું વળી તીનપતીનો જુગાર રમી પૈસાની હારજીત કરી રહ્યા છે. જે બાતમીના આધારે પોલીસે દરોડો પાડતા નાસભાગ મચી જવા પામી હતી. પોલીસના દરોડા દરમિયાન ચંદુ છગનભાઇ રાબડીયા,જસ્મીન મનસુખભાઈ ઝાલાવડિયા, દિવ્યેશ વાલજીભાઇ ભલસોડ,મિત દિનેશભાઇ ડેડાણિયા (રહે-તમામ જામજોધપુર)ને ઝડપી લીધા હતા જયારે ટોની ઢાબાવાળો, દાના કડીવાર,પ્રતીક જોશી, મેસૂર રબારી, મેરો રબારી, પ્રકાશ વીરાભાઇ પરમાર, ભૂટા કાલરીયા, અશોક બાવરીયા, જય કાંજીયા (રહે-તમામ જામજોધપુર)ના નાસી છૂટ્યા હતા. પોલીસે દરોડા દરમિયાન રોકડ, 12 મોટર સાઇકલ મળી કુલ રૂ. 3,71,200નો મુદામાલ કબ્જે કરી તમામ સામે ગુનો નોંધી ભાગી છૂટેલાની શોધખોળ હાથ ધરી છે.