એપોલો–૮ મિશનના પૂર્વ અવકાશયાત્રી અને સેવા નિવૃત્ત મેજર જનરલ વિલિયમ એન્ડર્સનું પ્લેન ક્રેશ થતા સર્જાયેલા અકસ્માતમાં મૃત્યુ થયું હતું. વાસ્તવમાં તે જે પ્લેનમાં મુસાફરી કરી રહ્યા હતા તે ક્રેશ થઈને પાણીમાં પડી ગયું હતું. તેઓ ૯૦ વર્ષના હતા. તેમના પુત્ર, નિવૃત્ત એરફોર્સ લેટનન્ટ કર્નલ ગ્રેગ એન્ડર્સે એસોસિએટેડ પ્રેસને તેમના મૃત્યુની પુષ્ટ્રિ કરી છે.

૧૯૬૮માં રિટાયર્ડ મેજર જનરલ વિલિયમે અવકાશમાંથી પહેલો 'અર્થરાઈઝ' ફોટો લીધો હતો જે ગ્રહને વાદળી માર્બલ (વાદળી રંગનો ફોટો) તરીકે દર્શાવે છે.વિલિયમ એન્ડર્સે આ ફોટો વિશે કહ્યું હતું કે આ ફોટો સ્પેસ પ્રોગ્રામમાં તેમનું સૌથી મહત્વનું યોગદાન હતું. આ ફોટો, અવકાશમાંથી જોવામાં આવેલો પૃથ્વીનો પ્રથમ રંગીન ફોટો છે અને આધુનિક ઇતિહાસમાં સૌથી મહત્વપૂર્ણ ફોટાઓમાંનો એક છે કારણ કે તે માનવ ગ્રહને જોવાની રીત બદલી નાખે છે. પૃથ્વી અવકાશમાંથી કેટલી નાજુક અને અલગ દેખાય છે તે દર્શાવીને વૈશ્વિક પર્યાવરણીય ચળવળને વેગ આપવાનો શ્રેય પણ ફોટોને આપવામાં આવે છે.

વિમાનમાં એક જ પાઈલટ હતો
સાન જુઆન કાઉન્ટીના શેરિફ એરિક પીટરે જણાવ્યું હતું કે, લગભગ ૧૧:૪૦ વાગ્યે, એક અહેવાલ આવ્યો કે એક જૂનું મોડલ વિમાન જોન્સ આઇલેન્ડના ઉત્તરીય છેડા પાસે પાણીમાં ક્રેશ થયું અને ડૂબી ગયું. ફેડરલ એવિએશન એસોસિએશનના જણાવ્યા અનુસાર, તે સમયે બીચ એ૪૫ એરપ્લેનમાં માત્ર એક પાયલટ સવાર હતો.