રાજ્યના ગૃહ વિભાગે ભ્રષ્ટાચાર સામે કડક કાર્યવાહી હાથ ધરી છે. રાજકોટના પૂર્વ ટાઉન પ્લાનિંગ ઓફિસર (ટીપીઓ) મનસુખ સાગઠિયા અને તેમના પરિવારજનોના નામે વસાવેલી કરોડો રૂપિયાની અપ્રમાણસર મિલકતો ટાંચમાં લેવાનો આદેશ આપવામાં આવ્યો છે. આ કાર્યવાહી ટીઆરપી ગેમઝોન અગ્નિકાંડના આરોપી મનસુખ સાગઠિયા સામે કરવામાં આવી છે.

સરકારી સૂત્રોના જણાવ્યા અનુસાર મનસુખ સાગઠિયા અને તેમના પરિવારના સભ્યોના નામે કુલ ₹23.15 કરોડની મિલકતો છે, જે ટાંચમાં લેવાશે. એન્ટી કરપ્શન બ્યુરો (ACB) દ્વારા કરવામાં આવેલી તપાસમાં જાણવા મળ્યું છે કે સાગઠિયાની કાયદેસરની આવક કરતા 628.42 ટકા વધુ મિલકતો છે, જે અપ્રમાણસર છે. આથી, રાજ્ય સરકારે આ મિલકતો ટાંચમાં લેવાની મંજૂરી આપી દીધી છે.

મહત્વનું છે કે, મનસુખ સાગઠિયા ટીઆરપી ગેમઝોન અગ્નિકાંડના મુખ્ય આરોપીઓમાંના એક છે, જેમાં અનેક લોકોએ જીવ ગુમાવ્યા હતા. આ ઘટના બાદ સાગઠિયા સામે ભ્રષ્ટાચારના આરોપો લાગ્યા હતા અને ACB દ્વારા તેમની સામે અપ્રમાણસર મિલકતનો ગુનો દાખલ કરવામાં આવ્યો હતો. હવે તેમની સામે કડક કાર્યવાહી કરીને તેમની કરોડોની મિલકત ટાંચમાં લેવાનો નિર્ણય લેવાયો છે.