નેપાળના ધૌલાગિરી પર્વત પર ગુમ થયેલા પાંચ રશિયન પર્વતારોહકો મંગળવારે 7000 મીટરની ઊંચાઈએથી મૃત હાલતમાં મળી આવ્યા હતા. હેલી એવરેસ્ટના વાઇસ ચેરમેન મિંગામા શેરપા, જે શોધ અને બચાવ કામગીરીમાં સામેલ હતા, તેમણે જણાવ્યું હતું કે પાંચ રશિયન ક્લાઇમ્બર્સે રવિવારે વિશ્વના સાતમા સૌથી ઊંચા શિખર પર ચઢવાનું શરૂ કર્યું હતું. બચાવ હેલિકોપ્ટરે 7700 મીટરની ઉંચાઈએ આરોહકોના મૃતદેહ જોયા.

એલેક્ઝાન્ડર ડુશેન્કો, ઓલેગ ક્રુગ્લોવ, વ્લાદિમીર ચિસ્તિકોવ, મિખાઇલ નોસેન્કો અને દિમિત્રી શ્પિલેવાએ સવારે 6 વાગ્યે શિબિર છોડી દીધી અને પછીથી બેઝ કેમ્પ સાથેનો સંપર્ક તૂટી ગયો. તેઓ 8,167 મીટર ઊંચા શિખર પર જતા સમયે ગુમ થઈ ગયા હતા.

ખરાબ હવામાનને કારણે બચાવ કાર્ય પૂર્ણ થયું નથી

નેપાળના પર્યટન વિભાગના નિર્દેશક રાકેશ ગુરુંગે જણાવ્યું હતું કે ખરાબ હવામાનને કારણે સોમવારે બચાવ કાર્ય થઈ શક્યું ન હતું. બચાવ હેલિકોપ્ટરે 7,700 મીટરની ઉંચાઈએ આરોહકોના મૃતદેહો જોયા. અન્ય એક રશિયન ક્લાઇમ્બરને હેલિકોપ્ટર દ્વારા બેઝ કેમ્પમાંથી બચાવી લેવામાં આવ્યા છે.

સૂર્યકુંડ વિસ્તારમાં ટ્રેકિંગ દરમિયાન મોત

આ દરમિયાન સોમવારે રાત્રે ઉત્તર નેપાળના રાસુવા અને નુવાકોટ જિલ્લાની સરહદ પર સૂર્યકુંડ વિસ્તારમાં ટ્રેકિંગ કરતી વખતે પોલેન્ડની 23 વર્ષીય પર્યટક સોવિન્સ્કા અગ્નિસ્કાનું મૃત્યુ થયું હતું.