મધ્ય પૂર્વ (મિડલ ઈસ્ટ) માં ચાલી રહેલો સૈન્ય સંઘર્ષ હવે અત્યંત ખતરનાક વળાંક પર પહોંચી ગયો છે. ઈરાનના રાષ્ટ્રપતિ અને સુપ્રીમ લીડર દ્વારા અમેરિકાને ખુલ્લી ચેતવણી આપવામાં આવી રહી છે, ત્યારે બીજી તરફ ઈરાનની સૈન્ય પાંખ ઇસ્લામિક રિવોલ્યુશનરી ગાર્ડ કોર્પ્સ (IRGC) એ અમેરિકાના અતિ આધુનિક અને મોંઘા ‘MQ-9 રીપર ડ્રોન’ (MQ-9 Reaper Drone) ને આકાશમાં જ તોડી પાડ્યાનો સનસનાટીભર્યો દાવો કર્યો છે.

ઈરાન ઈન્ટરનેશનલના અહેવાલ મુજબ, ઈરાનના સર્વોચ્ચ નેતા મોજતબા ખામેનેઈ તરફથી એક સત્તાવાર સંદેશ જાહેર કરવામાં આવ્યો છે. આ સંદેશમાં દાવો કરાયો છે કે વર્તમાન સંઘર્ષ દરમિયાન ઈરાને અમેરિકા અને ઈઝરાયેલને જમીન, સમુદ્ર અને આકાશ એમ ત્રણેય મોરચે મિસાઈલો અને ડ્રોન હુમલા દ્વારા નિશાન બનાવ્યા છે.

અમેરિકી ડ્રોન પર ઈરાનનો પ્રહાર
ઈરાનની સેના (IRGC) ના જણાવ્યા અનુસાર, અમેરિકાનું શક્તિશાળી MQ-9 રીપર ડ્રોન ઈરાનની હવાઈ સરહદમાં ઘૂસણખોરી કરી રહ્યું હતું. ઈરાની એર ડિફેન્સે તેને દુશ્મનનું વિમાન ગણીને તાત્કાલિક આકાશમાં જ ફૂંકી માર્યું હતું. સેનાએ સ્પષ્ટ કર્યું છે કે અમેરિકા દ્વારા કરવામાં આવતા કોઈપણ સૈન્ય ઉલ્લંઘન સામે જવાબી કાર્યવાહી કરવાનો ઈરાનને સંપૂર્ણ અધિકાર છે. નોંધનીય છે કે, આ ઘટનાના ગણતરીના કલાકો પહેલા જ અમેરિકી સેનાએ ઈરાનના રોકેટ લોન્ચિંગ સ્થાનો પર ‘રક્ષણાત્મક’ હવાઈ હુમલા કર્યાની જાહેરાત કરી હતી.

ખામેનેઈની પડોશી દેશોને કડક ચેતવણી
હજ યાત્રાના પવિત્ર અવસર પર જાહેર કરાયેલા પોતાના સંદેશમાં ખામેનેઈએ આસપાસના અરબ દેશોને પણ આડકતરી ચેતવણી આપી છે. તેમણે કહ્યું કે, હવે આ ક્ષેત્રના દેશો અમેરિકી સેનાની હાજરી માટે ઢાલ તરીકે કામ કરવાનું બંધ કરે. અમેરિકાને હવે આ વિસ્તારમાં પોતાના નવા સૈન્ય મથકો (Military Bases) બનાવવા માટે કોઈ પણ સુરક્ષિત જગ્યા મળશે નહીં. તેમણે ઉમેર્યું કે મિડલ ઈસ્ટના દેશોના હિતો એકબીજા સાથે જોડાયેલા છે અને આ એકતા સમગ્ર વિશ્વમાં એક ‘નવી વ્યવસ્થા’ સ્થાપિત કરવામાં મદદરૂપ સાબિત થશે.

ઇસ્લામિક દુનિયાને એક થવા આહવાન
પોતાના નિવેદનમાં ‘અમેરિકાનો નાશ થાઓ’ અને ‘ઈઝરાયેલનો નાશ થાઓ’ જેવા સૂત્રોનો ઉલ્લેખ કરતા ખામેનેઈએ જણાવ્યું કે, આ નારા સમગ્ર ઇસ્લામિક દેશોની યુવા પેઢીને એક કરવા માટે હંમેશા શક્તિશાળી પ્રતીક તરીકે ગૂંજતા રહેશે.

​​​​​​​યુદ્ધની શરૂઆત થઈ ત્યારથી જ સુપ્રીમ લીડર મોજતબાની કોઈ નવી તસવીર કે ઓડિયો રેકોર્ડિંગ સત્તાવાર રીતે સામે આવ્યું નથી. આવા સમયે આ લેખિત સંદેશ જાહેર થવો એ દર્શાવે છે કે ઈરાન આ ક્ષેત્રમાં પોતાની પકડ મજબૂત કરવા અને પોતાના સાથી સંગઠનોને અમેરિકા સામે એકજૂથ કરવા માટે સક્રિય બન્યું છે. આ ઘટના બાદ સમગ્ર મિડલ ઈસ્ટમાં ભારે તણાવ વ્યાપી ગયો છે.