​​​​​​​વડાપ્રધાન નરેન્દ્ર મોદી રશિયાની મુલાકાતે છે. તે જ સમયે અમેરિકામાં નાટોની બેઠક ચાલી રહી છે. રશિયાએ યુક્રેનના 5 શહેરો પર 40થી વધુ મિસાઈલોથી હુમલો કર્યો છે, જેના કારણે યુક્રેનને ઘણું નુકસાન થયું છે. યુક્રેનના રાષ્ટ્રપતિ વોલોડીમિર ઝેલેન્સકીએ આ વાતની પુષ્ટિ કરી છે. રશિયાએ છેલ્લા 24 કલાકમાં યુક્રેન પર વધુ 55 હવાઈ હુમલા કર્યા હતા. જેમાં ઓછામાં ઓછા 11 લોકોએ જીવ ગુમાવ્યા હતા અને 40થી વધુ ઘાયલ થયા હતા. છેલ્લા 2 વર્ષથી ચાલી રહેલ આ યુદ્ધ અટકવાના કોઈ સંકેત દેખાતું નથી. વિશ્વભરના દેશો આ યુદ્ધને રોકવા માટે સતત પ્રયાસ કરી રહ્યા છે.

યુક્રેને 27 ડ્રોન વડે હુમલો કર્યો

બદલો લેવા માટે બંને દેશો એકબીજા પર સતત હુમલા કરી રહ્યા છે. યુક્રેનના જનરલ સ્ટાફે જણાવ્યું કે શનિવારે યુક્રેન અને રશિયાની સેનાઓ વચ્ચે 45 અથડામણ થઈ હતી. રશિયન સૈનિકો અહીં ડ્રોન વડે પાણીની ટાંકીઓ પર હુમલો કરતા જોવા મળ્યા હતા. યુક્રેને કહ્યું કે તેણે 27માંથી 24 રશિયન ડ્રોન તોડી પાડ્યા. દેશમાં સૌથી વધુ નુકસાન પૂર્વીય વિસ્તારોમાં થયું છે. રશિયન સંરક્ષણ મંત્રાલયે કહ્યું કે તેણે પૂર્વી યુક્રેનમાં 30 કિલોમીટર સુધી કબજો કરી લીધો છે.

તે જ સમયે યુક્રેનિયન વાયુસેનાએ જણાવ્યું હતું કે રશિયન સેનાએ સોમવારે યુક્રેનિયન લક્ષ્યો પર ઘણી બેલેસ્ટિક અને ક્રુઝ મિસાઇલો છોડી હતી. રાજધાની કિવમાં વિસ્ફોટના આંચકા અનુભવાયા હતા. શહેરના વિવિધ વિસ્તારોમાંથી ધુમાડાના ગોટેગોટા નીકળતા જોવા મળ્યા હતા. જોકે આ હુમલામાં કોઈ જાનહાનિના તાત્કાલિક અહેવાલ ઉપલબ્ધ નથી. વાયુસેનાએ કહ્યું કે આ હુમલામાં કિંજલ હાઇપરસોનિક મિસાઇલનો ઉપયોગ કરવામાં આવ્યો હતો, જે રશિયાના સૌથી શક્તિશાળી હથિયારોમાંથી એક છે. કિંજલ અવાજ કરતા 10 ગણી ઝડપે ઉડે છે જેના કારણે તેને રોકવી મુશ્કેલ બને છે.