કલ્યાણપુર તાલુકાના મેવાસા ગામે રહેતા એક પરપ્રાંતિય શ્રમિક પરિવારની આઠ વર્ષની પુત્રી અંજલી રાકેશભાઈ વરકોરિયાને સર્પદંશ થતા આ અંગે તેણીના પિતા દ્વારા ઈમરજન્સી ૧૦૮ ને જાણ કરવામાં આવી હતી. જેના અનુસંધાને રાણ-લીંબડીના ૧૦૮ ની ફરજ પર રહેલા ઈએમટી મુકેશભાઈ બાંભણિયા તથા પાયલોટ અક્ષયભાઈ ચૌહાણ આ સ્થળે દોડી ગયા હતા. આ સ્થળે પહોંચતા બાળકીને શ્વાસમાં તકલીફ થતી હોવા સાથે ઉલટી અને આંખે અંધારા આવતા હોવાથી આ બાળકીને તાત્કાલિક કૃત્રિમ શ્વાસ આપી અને સાથે સાથે એન્ટી સ્નેક વિનોમ ઇન્જેક્શનના ડોઝ પણ આપવામાં આવ્યા હતા. અહીં બાળકીને જરૂરી સારવાર બાદ જામનગરની જી.જી. હોસ્પિટલમાં ખસેડવામાં આવી હતી. જ્યાં તેણીની હાલત સ્થિર બની રહી હતી. આમ, ઈમરજન્સી ૧૦૮ એ સર્પદંશ થતા પરપ્રાંતિય બાળાનો જીવ બચાવ્યો હતો.