અબજોપતિ ઉદ્યોગપતિ ઈલોન મસ્કે ટ્રમ્પના 'બિગ બ્યુટીફૂલ બિલ' બાબતે અસહમતિને લીધે યુએસ રાષ્ટ્રપતિ ડોનાલ્ડ ટ્રમ્પના વહીવટીતંત્ર સાથેના સંબંધો તોડી નાખ્યા છે. બુધવારે, મસ્કે તેમના સોશિયલ મીડિયા હેન્ડલ્સ પર સરકારી કાર્યક્ષમતા વિભાગ ડોજના વડાના પદ પરથી રાજીનામું આપી દેવાની જાહેરાત કરી હતી અને રાષ્ટ્રપતિ ટ્રમ્પનો પોતાનામાં વિશ્વાસ દર્શાવવા અને તેમને તેમના વહીવટમાં એક ખાસ સરકારી કર્મચારી તરીકે સામેલ કરવા બદલ આભાર માન્યો હતો. એપીના અહેવાલ મુજબ, વ્હાઇટ હાઉસમાં કામ કરતા એક કર્મચારીએ પણ પુષ્ટિ આપી છે કે મસ્ક હવે ટ્રમ્પના મહત્વાકાંક્ષી ડોજ પ્રોજેક્ટના વડા નથી.

મસ્કે કહ્યું કે આનાથી ખર્ચ નોંધપાત્ર રીતે વધશે

ટેસ્લાના વડાનું આ નિવેદન એવા સમયે આવ્યું છે જ્યારે ઘણા સમયથી અટકળો ચાલી રહી હતી કે બંને વચ્ચે બધુ બરાબર નથી. મસ્કે થોડા દિવસો પહેલા ટ્રમ્પના બિગ બ્યુટીફૂલ બિલના નિર્ણયની ટીકા કરી હતી અને કહ્યું હતું કે રાષ્ટ્રપતિએ જેને સુંદર બિલ કહ્યું તેનાથી તેઓ નિરાશ થયા છે. મસ્કે કહ્યું કે આનાથી ખર્ચ નોંધપાત્ર રીતે વધશે જેનાથી ફેડરલ ખાધ વધશે.

હું તેના કેટલાક પાસાઓથી ખુશ નથી

મસ્કે સીબીએસને આપેલા એક ઈન્ટરવ્યુમાં કહ્યું હતું કે "મને લાગે છે કે બિલ કાં તો મોટું અથવા સુંદર હોઈ શકે છે... પણ મને નથી લાગતું કે બિલ બંને હોઈ શકે. હું તેના કેટલાક પાસાઓથી ખુશ નથી, પરંતુ હું તેના અન્ય પાસાઓથી રોમાંચિત છું." રાષ્ટ્રપતિ ટ્રમ્પે એવું પણ સૂચન કર્યું છે કે તેમાં વધુ ફેરફારો થશે.

મસ્ક સ્પેસએક્સ પ્રોગ્રામ પર ધ્યાન કેન્દ્રિત કરવાનું શરૂ કરશે

જોકે, ઈલોન મસ્કનું મન રાજકારણમાં સક્રિય રહેવા બાબતે ગૂંચવણોથી ભરેલું હોય તેવું લાગે છે. પદ છોડવાના નિર્ણયની જાહેરાત કરતા પહેલા, મસ્કે સંકેત આપ્યો હતો કે સરકાર માટે તેમનું કામ પૂર્ણ થઈ ગયું છે. આ પછી, તે હવે તેની કાર મેન્યુફેક્ચરિંગ કંપની ટેસ્લા અને સ્પેસએક્સ પ્રોગ્રામ પર ધ્યાન કેન્દ્રિત કરવાનું શરૂ કરશે.​​​​​​​

ડોજનું હવે શું થશે?

મસ્કે ભલે રાજીનામું આપવાની જાહેરાત કરી હોય. તેમણે એ પણ સંકેત આપ્યો છે કે ડોજ રાબેતા મુજબ ચાલુ રહેશે. રાષ્ટ્રપતિ બન્યા પછી જ્યારે ટ્રમ્પે ડોજની રચના કરી ત્યારે તેમણે સ્પષ્ટતા કરી હતી કે આ એક કામચલાઉ વિભાગ છે, જે ફક્ત જુલાઈ 2026 સુધી જ અસ્તિત્વમાં રહેશે. આવી સ્થિતિમાં, હવે જ્યારે મસ્કે તેને અલવિદા કહી દીધું છે, ત્યારે લોકોને લાગી રહ્યું છે કે હવે આ વિભાગ સારી રીતે કામ નહીં કરી શકે. ઘણા અહેવાલોમાં એવું કહેવામાં આવી રહ્યું છે કે આ વિભાગ કેબિનેટ સચિવ પાસે જશે. પરંતુ ટ્રમ્પ કે વહીવટીતંત્ર તરફથી હજુ સુધી આ અંગે કોઈ સત્તાવાર પ્રતિક્રિયા આવી નથી. ડોજ વિભાગ જુલાઈ 2026 સુધી કાર્યરત રહેશે. આવી સ્થિતિમાં, આ જવાબદારી કોઈ મહત્વપૂર્ણ વ્યક્તિને સોંપવી જરૂરી છે.

મસ્કે શું કહ્યું?

અમેરિકન સરકારના ખાસ સરકારી કર્મચારી તરીકેનો મારો નિર્ધારિત સમય પૂરો થયો. હું રાષ્ટ્રપતિટ્રમ્પનો આભાર માનું છું કે તેમણે મને નકામા ખર્ચ ઘટાડવાની તક આપી. ડોજ મિશન સમય જતાં વધુ મજબૂત બનશે કારણ કે તે સરકાર માટે જીવનનો એક માર્ગ બનશે.