ગોંડલમાં ભગવતપરા વિસ્તારમાં રહેતા અને રાજકોટમાં નોકરી કરનાર યુવાનને અહીં રાજકોટમાં તેની સાથે નોકરી કરનાર ગોંડલના યુવાન સાથે સામું જોવા બાબતે બોલાચાલી થઈ હતી. બાદમાં આ વાતનો ખાર રાખી યુવાન અહીં ગોંડલમાં હતો ત્યારે આ શખસ તથા તેની સાથેના 8 શખસોએ મળી યુવાનને ઢીકાપાટુ તથા ધોકા વડે મારમારી તેના મોબાઈલમાં તોડફોડ કરી જાનથી મારી નાખવાની ધમકી આપી હતી. આ અંગે યુવાનની ફરિયાદ પરથી પોલીસે આરોપીઓ સામે એટ્રોસિટી એક્ટ સહિતની કલમો હેઠળ ગુનો નોંધ્યો છે.
બનાવની જાણવા મળતી વિગતો મુજબ, ગોંડલના ભગવતપરા શેરી નંબર 29/12 ના ખૂણે રહેતા દિપક બાઉદીનભાઈ પરમાર (ઉ.વ 21) નામના યુવાને ગોંડલ સીટી પોલીસ સ્ટેશનમાં નોંધાવેલી ફરિયાદમાં જણાવ્યું હતું કે, તે રાજકોટમાં ભક્તિનગર શેરી નંબર પાંચમાં આવેલી આર.કે એન્ટરપ્રાઇઝમાં મ્યુચ્યુઅલ ફંડ અંગેનું કામ કરે છે અને દરરોજ રાજકોટથી ગોંડલ અપડાઉન કરે છે. ગત તા.7/1 ના રોજ સાંજના તે રાજકોટથી ગોંડલ આપ્યા બાદ અહીં ગુંદાળા દરવાજા પાસે તેમની કેબિન હોય ત્યાં જતો હતો. દરમિયાન રાજકોટમાં તેની સાથે નોકરી કરતો રાજદીપ પઢિયાર તથા તેની સાથે ઉદીત, પૃથ્વી અને અહેમદ અહીં આવ્યા હતા અને રાજદીપએ યુવાન સાથે બોલાચાલી કરી કહેતો હતો કે, રાજકોટ તું મારી સામે શું જોતો હતો? તેમ કહી યુવાને ઢીકાપાટુ તથા ધોકા વડે મારમાર્યો હતો તેમજ કહ્યું હતું કે, આજે તો બચી ગયો પણ હવે મારી સામું જોઇશ તો જાનથી મારી નાખીશ તેવી ધમકી આપી હતી. હુમલામાં યુવાનને ઇજા પહોંચી હોય તેને સારવાર માટે હોસ્પિટલ ખસેડવામાં આવ્યો હતો. બાદમાં તેણે આ અંગે રાજદીપ, ઉદીત, પૃથ્વી, અહેમદ અને તેની સાથેના પાંચ થી છ અજાણ્યા શખસોના નામ આપ્યા છે.