ખાલી પડેલી 30 જગ્યા માટે યોજાયો કેમ્પ: હજુ પણ એક ડઝનથી વધુ જગ્યાઓ ખાલી

સરકારી શિક્ષણને શિક્ષક અછતની ઘટનું ગ્રહણ લાંબા સમયથી લાગેલું છે, કોઇપણ કારણે સક્ષમ હોવા છતાં સરકારી તંત્ર દ્વારા આ ખોટ પુરી કરી શકાતી નથી, જો કે હવે જામનગરમાં શિક્ષણ સમિતિ દ્વારા સંચાલીત સરકારી શાળાઓમાં ખાલી પડેલી જગ્યાઓ પર નિમણુંકો આપવાની શઆત થઇ છે, હજુ પણ એક ડઝનથી વધુ જગ્યાઓ ખાલી છે.

જામનગર નગર પ્રાથમિક શિક્ષણ સમિતિ દ્વારા પ્રાથમિક શિક્ષકોની ખાલી જગ્યા પર સરકારના નિયમો મુજબ નિયામકની સૂચના અનુસાર જિલ્લા ફેર બદલી કેમ્પનું આયોજન કરાયું હતું. જેમાં શિક્ષણ સમિતિની વિવિધ શાળાઓમાં પ્રાથમિક વિભાગના ધો. 1 થી 5 માટે કુલ 30 ખાલી જગ્યા માટે યોજાયેલા કેમ્પમાં કુલ 18 શિક્ષકો અન્ય જિલ્લામાંથી નગર પ્રાથમિક શિક્ષણ સમિતિની શાળામાં ઓર્ડર કરવામાં આવ્યા હતાં. જ્યારે 12 જગ્યા માટે આગામી સમયમાં ઓનલાઇન બદલી કેમ્પ માટે અગ્રીમતાના ઉમેદવારો માટે ભરવાની થશે.

આ બદલી કેમ્પ ચેરમેન પરષોતમભાઇ કકનાણીના અધ્યક્ષ સ્થાને પસંદગી સમિતિના સભ્યો જિલ્લા શિક્ષણાધિકારીના પ્રતિનિધિ જિલ્લા શિક્ષણ અને તાલીમ ભવનના પ્રતિનિધિની હાજરીમાં તેમજ ગુજરાત રાજ્ય નગર પ્રાથમિક શિક્ષક સંઘના પ્રમુખ ચંદ્રકાંત ખાખરીયાની વિશેષ ઉપસ્થિતિ યોજાયો હતો. જેમાં ઉમેદવારોને બદલીના ઓર્ડર ચેરમેન અને વાઈશ ચેરમેન દિનેશભાઈ તથા શિક્ષણ સમિતિના સભ્યો અને સંઘના હોદેદારોના હસ્તે આપવામાં આવ્યા હતાં. ટુંક સમયમાં બાકી રહેતી 12 જગ્યા માટે ઓનલાઈન કેમ્પની કાર્યવાહી હાથ ધરવામાં આવશે. કેમ્પની કાર્યવાહી પૂર્ણ થતાં સમિતીની તમામ સ્કૂલોમાં શિક્ષકોની ઘટ પૂર્ણ થશે.