ચૂંટણી કમિશનર અરુણ ગોયલે શનિવારે પોતાના પદ પરથી રાજીનામું આપીને બધાને ચોંકાવી દીધા હતા. તેમણે રાજીનામું એવા સમયે આપ્યું છે જ્યારે થોડા દિવસોમાં સામાન્ય ચૂંટણીની જાહેરાત થવાની છે. અરુણ ગોયલ ચૂંટણી પંચમાં બીજા ટોચના અધિકારી હતા. તેમનો કાર્યકાળ 2027 સુધીનો હતો.

ચૂંટણી કમિશનર અરુણ ગોયલે આગામી લોકસભા ચૂંટણી 2024 પહેલા રાજીનામું આપી દીધું છે. અરુણ ગોયલનું રાજીનામું રાષ્ટ્રપતિ દ્રૌપદી મુર્મુએ સ્વીકારી લીધું છે. કાયદા અને ન્યાય મંત્રાલયે અરુણ ગોયલના રાજીનામાની નોટિસ જારી કરી છે. તમને જણાવી દઈએ કે આગામી દિવસોમાં લોકસભા ચૂંટણીની તારીખોની જાહેરાત થઈ શકે છે.

કાયદા અને ન્યાય મંત્રાલયે એક સૂચનામાં જણાવ્યું હતું કે રાષ્ટ્રપતિ દ્રૌપદી મુર્મુએ ચૂંટણી કમિશનર તરીકેના તેમના પદ પરથી ગોયલનું રાજીનામું સ્વીકારી લીધું છે. ત્રણ સભ્યોના ચૂંટણી પંચમાં એક પદ પહેલેથી જ ખાલી છે. ગોયલના રાજીનામા બાદ હવે પંચમાં માત્ર મુખ્ય ચૂંટણી કમિશનર રાજીવ કુમાર જ બચ્યા છે.