રાજકોટ મહાપાલિકા સંચાલિત સિટી બસ સેવા તેની સેવાના બદલે ડ્રાઇવર કંડકટરોની અવનવી ઉટપટાંગ હરકતો અને અકસ્માતોને લીધે વધુમાં ચર્ચામાં રહેવા લાગી છે. દરમિયાન ગત તા.૧ માર્ચને શનિવારે એક વિડીયોએ સોશ્યલ મીડિયામાં ધૂમ મચાવી હતી જેમાં મ્યુનિ.સિટી બસનો ડ્રાઇવર ચાલુ બસે સ્ટિયરિંગ ઉપરથી બંને હાથ હટાવી લઇને પાનની દુકાને મુકાતા પાટિયાના રબ્બર ઉપર ફાકી ચોળતો હોય તેવી રીતે ફાકી ચોળતો હતો. આ ડ્રાઇવરને તાત્કાલિક અસરથી બરતરફ કરવા હુકમ કરાયો છે.

વિશેષમાં મહાપાલિકાના અધિકારી સૂત્રોએ જણાવ્યું હતું કે શનિવારે બીઆરટીએસ રૂટ ઉપર માધાપર ચોકડીથી ગોંડલરોડ ચોકડી તરફ જતી ઇલેક્ટ્રિક બસ નં.ઇ-૨૫ના ડ્રાઇવર (આઇ.ડી.નંબર ૩૦૩) એ અયોધ્યા ચોક નજીક ચાલુ બસે સ્ટિયરિંગ ઉપરથી બંને હાથ હટાવી લઇને પાનની દુકાને પાટિયા ઉપર ફાકી ચોળતો હોય તેવી રીતે ફાકી ચોળતો હોવાના દ્રશ્યો કેમેરામાં કેદ થયા હતા જે બદલ તાત્કાલિક અસરથી કાર્યવાહી હાથ ધરીને તેને બરતરફ કરવામાં આવ્યો છે.

આ તકે મ્યુનિ.અધિકારી વર્તુળોએ ફાકી ચોળતા ડ્રાઇવરનું શૂટિંગ ઉતારનાર તેમજ આ વિડીયોને સોશ્યલ મીડિયાના માધ્યમથી મહાપાલિકા તંત્ર સુધી પહોંચાડનાર સૌ જાગૃત નાગરિકોનો આભાર વ્યક્ત કરતા જણાવ્યું છે કે ભવિષ્યમાં પણ કોઇ પણ સ્થળે સિટી બસના ડ્રાઇવરો કે હેલ્પરો દ્વારા મુસાફરોના જીવને જોખમમાં મુકતી હરક્ત કરવામાં આવે તો તુરંત જ મહાપાલિકા તંત્રનું ધ્યાન દોરવા અનુરોધ છે.