આજે સવારે બાબરા-અમરેલી રોડ પર લુણકી ગામ નજીક પેટ્રોલ-ડીઝલનો ટેન્ક બ્લાસ્ટ થયો હતો. બ્લાસ્ટ બાદ ટેન્કરમાં ભીષણ આગ લાગી હતી. આ દુર્ઘટનામાં ડ્રાઇવર ભડથું થઈ જતા તેનું કમકમાટીભર્યું મોત નીપજ્યું છે. 

3 કલાકે આગ કાબૂમાં આવી 

મળતી માહિતી પ્રમાણે સવારે 6.30 વાગ્યે આ બનાવ બન્યો હતો. ઘટનાની જાણ થતા બાબરા નગરપાલિકાની ફાયરબ્રિગેડની ટીમ દોડી ગઈ હતી. ફાયર વિભાગના અજયસિંહ સોલંકીને જાણ થતાં તુરંત તેઓ ઘટનાસ્થળે પહોંચી આગમાં લપેટાયેલા ટેન્કર પર પાણીનો મારો કર્યો હતો. 3 કલાકે આગ કાબૂમાં આવી હતી અને બાબરા પોલીસ પણ તુરંત ઘટનાસ્થળે દોડી ગઈ હતી. ​​​​​​​

બ્લાસ્ટનો અવાજ દૂર દૂર સુધી સંભળાયો

ટેન્કર બ્લાસ્ટ થતા જ તેમાંથી પ્રચંડ અવાજ નીકળ્યો હતો. આ અવાજ દૂર દૂર સુધી સંભળાતા આસપાસના લોકોમાં ડરનો માહોલ જોવા મળ્યો હતો. ઘટનાને લઈ લોકો પણ દોડી ગયા હતા.