રાજકોટ, લોધિકા અને પડધરી તાલુકાના ૧૮૦ ગામોનું વિશાળ કાર્યક્ષેત્ર ધરાવતા રાજકોટના બેડી માર્કેટ યાર્ડમાં તા.૧૧થી ૧૭ સુધી દિવાળીના તહેવારોની રજા કરાઇ છે, સૌરાષ્ટ્રના અન્ય યાર્ડ પણ રાજકોટ યાર્ડને અનુસરતા હોય લાભ પાંચમથી મુહૂર્તના સોદા થશે.વિશેષમાં રાજકોટ માર્કેટ યાર્ડના ચેરમેન જયેશભાઇ બોઘરાએ જણાવ્યું હતું કે વેપારીઓ, કમિશન એજન્ટ્સ અને મજૂરોની માંગણીને અનુલક્ષીને દિવાળીના આગામી તહેવારો દરમિયાન રાજકોટના મુખ્ય બેડી યાર્ડમાં તા.૧૧થી ૧૭ નવેમ્બર સુધી રજા રહેશે. જ્યારે શાકભાજી વિભાગમાં તા.૧૩થી ૧૭, બટેટા વિભાગમાં તા. ૧૨થી ૧૫, ડુંગળી વિભાગમાં તા.૧૩થી ૧૭ અને ઘાસચારા વિભાગમાં તા.૧૨થી ૧૫ સુધી હરરાજી સહિતના કામકાજ બંધ રહેશે. મુખ્ય યાર્ડમાં તા.૧૭ને લાભ પાંચમથી મુહૂર્તના સોદા થશે.