વડાલથી બામણ ગામ જતા ગાડા માર્ગના રસ્તે  પીજીવીસીએલ દ્વારા નડતરરૂપ વીજપોલ ઉભા કરાતા ખેડૂતોને વાહનો ચલાવવામાં પડતી મુશ્કેલી મામલે વીજ પોલ દૂર કરવાની માંગ સાથે ખેડૂતોએ પીજીવીસીએલ અધિકારીઓને આવેદનપત્ર પાઠવી તાત્કાલિક ખેડૂતોના હિતમાં નિર્ણય લેવા રજૂઆત કરી  હતી અને ખેડૂતોની માંગ નો ઉકેલ નહીં આવે તો કોર્ટ કાર્યવાહીની ચીમકી અપાઈ હતી. 
વડાલ થી બામણ ગામ જતા જુના ગ્રામ્ય ગાડા માર્ગ પર વડાલ ગામના ૬૦ થી ૭૦ અને બામણ ગામના ૧૫ મળી ૭૫ ખેડૂતોની ૩૦૦ વીઘા થી વધુ જમીન આવેલી છે. ખેતીની જમીન હોવાથી ખેડૂતો દ્વારા ટ્રેક્ટર ,ગાડા, મોટર સાયકલ જેસીબી, કટર સહિતના વાહનો લઇ આવન જાવન રહે છે. ત્યારે ગ્રામ્ય માર્ગ પર ઔદ્યોગિક કનેક્શન આપવા પીજીવીસીએલ રૂરલ ડિવિઝન દ્વારા  જમીનમાં પોલ ઊભા કરવા પ્રયત્ન કરેલ તે સમયે ખેડૂતોએ વાંધા અરજી રજૂ કરતા કામગીરી સ્થગિત કરવામાં આવી હતી. પરંતુ પીજીવીસીએલ દ્વારા  વાહનો ચલાવવામાં નડતરરૂપ થાય તેવી રીતે જમીનો પર વીજપોલ ઉભા કરવામાં આવતા ખેડૂતોને વાહનો ચલાવવામાં મુશ્કેલી પડી રહી છે.