ગુજરાત સરકારના નાયબ મુખ્યમંત્રી હર્ષ સંઘવીને મહાત્મા ગાંધી સાબરમતી આશ્રમ મેમોરિયલ ટ્રસ્ટના ગવર્નિંગ કાઉન્સિલના ઉપાધ્યક્ષ તરીકે નિયુક્ત કરવામાં આવ્યા છે. રાજ્ય સરકાર દ્વારા લેવામાં આવેલા આ નિર્ણયને ગાંધી આશ્રમના સંચાલન અને વિકાસ માટે મહત્વપૂર્ણ પગલું માનવામાં આવી રહ્યું છે. હર્ષ સંઘવીને મળેલી આ જવાબદારીથી આશ્રમ સાથે જોડાયેલી પ્રવૃત્તિઓને વધુ ગતિ અને દિશા મળશે તેવી અપેક્ષા વ્યક્ત કરવામાં આવી રહી છે.

આ સાથે જ નિવૃત્ત IAS અધિકારી આઈ.કે. પટેલને સાબરમતી આશ્રમ મેમોરિયલ ટ્રસ્ટની ગવર્નિંગ કાઉન્સિલમાં સભ્ય સચિવ તરીકે નિમણુંક આપવામાં આવી છે. આઈ.કે. પટેલને વહીવટી ક્ષેત્રમાં લાંબો અનુભવ હોવાથી ટ્રસ્ટના દૈનિક કાર્યો, આયોજન અને સંકલનમાં તેઓ મહત્વની ભૂમિકા ભજવશે.

સાબરમતી આશ્રમ મહાત્મા ગાંધીના જીવન અને સ્વતંત્રતા આંદોલન સાથે ગાઢ રીતે જોડાયેલો ઐતિહાસિક સ્થળ છે. દેશ-વિદેશમાંથી મોટી સંખ્યામાં પ્રવાસીઓ અને ગાંધીચિંતનના અનુયાયીઓ અહીં મુલાકાત લે છે. ટ્રસ્ટના નવા પદાધિકારીઓની નિમણુંકથી આશ્રમના સંરક્ષણ, વિકાસ અને ગાંધીજીના વિચારોના પ્રચાર-પ્રસારને વધુ મજબૂતી મળશે તેવી આશા વ્યક્ત કરવામાં આવી રહી છે.