દરજી સમાજ  દ્વારા વિશાળ રેલી કાઢી એસપી-કલેકટરને અપાયું આવેદન

મચ્છુ કઠીયા સઇ સુથાર જ્ઞાતિ (દરજી સમાજ) દ્વારા ગઇ સાંજે વિશાળ રેલી કાઢી જિલ્લા પોલીસ વડા અને જિલ્લા કલેકટર કચેરીમા આવેદન પત્ર પાઠવી તરુણની હત્યા નીપજાવનાર આરોપીઓને કડક સજા થાય તે અંગે માંગણી કરી હતી.
અત્રે ઉલ્લેખનીય છે કે થોડા દિવસ પહેલા જામનગરનાં ગુલાબનગર, મોહન નગર આવાસમા રહેતા ૧૬ વર્ષનાં તરૂણનું અપહરણ કરવામાં આવ્યા પછી તેની ગળું દબાવી ઘાતકી હત્યા નિપજાવ્યાં પછી મૃતેદેહને પેટ્રોલ છાંટી સળગાવાયો હતો. જેમાં તેના જ મિત્રો સંડોવાયા હોય પોલીસે બંનેની ધરપકડ કરી લીધી છે. ત્યારે આ કૃત્ય આચરનારા બંને આરોપીઓને કડક સજા થાય તે માટે માંગણી કરતું આવેદન પત્ર દરજી સમાજ દ્વારા પાઠવાયું હતું.