દિલ્હીના નવા મુખ્યમંત્રી કોણ હશે તે અંગેનો નિર્ણાયક નિર્ણય આવતીકાલે લેવામાં આવશે. ભારતીય જનતા પાર્ટી (ભાજપ) વિધાનસભા પક્ષની બેઠક બપોરે યોજાશે, જેમાં ગૃહના નેતાની પસંદગી કરી નવી સરકારના મુખ્યમંત્રીનું નામ નક્કી કરવામાં આવશે.

સૂત્રો મુજબ, મુખ્યમંત્રીની શપથવિધિ 19 અથવા 20 ફેબ્રુઆરીએ યોજાઈ શકે છે. ભાજપના 48 ધારાસભ્યોમાંથી 15 નામ પસંદ કરવામાં આવ્યા છે, જેમાંથી 9 શોર્ટલિસ્ટ થશે અને તદ્દન અંતિમ તબક્કે મુખ્યમંત્રી, મંત્રીઓ અને વિધાનસભાના સ્પીકર માટેના નામ નક્કી થશે.

હાલના સંજોગોમાં, રેખા ગુપ્તા, પ્રવેશ વર્મા, મોહન સિંહ બિષ્ટ, વિજેન્દ્ર ગુપ્તા, સતીશ ઉપાધ્યાય, આશિષ સૂદ, શિખા રાય અને પવન શર્મા જેવા કેટલાક દાવેદારોની ચર્ચા ચાલી રહી છે. જોકે, રાજસ્થાન અને મધ્યપ્રદેશની જેમ દિલ્હી માટે પણ વડા પ્રધાન નરેન્દ્ર મોદી અને ગૃહપ્રધાન અમિત શાહ કોઈ સરપ્રાઈઝ આપી શકે છે, એવી અટકળો રાજકીય વર્તુળોમાં થઈ રહી છે.

દિલ્હી માટે આ રાજકીય સમીકરણો ખૂબ મહત્વપૂર્ણ બની રહ્યા છે અને આવતીકાલની બેઠક બાદ ભાજપના નવા મુખ્યમંત્રીના નામ પર સત્તાવાર જાહેરાત કરવામાં આવશે.