સિક્કિમમાં વાદળ ફાટ્યા બાદ અચાનક પૂરના કારણે રાજ્યભરમાં ભારે નુકસાન જોવા મળી રહ્યું છે. ઘણા લોકો મૃત્યુ પામ્યા છે અને ઘણા હજુ પણ લાપતા છે. ગયા અઠવાડિયે ઉત્તર સિક્કિમમાં આવેલા અચાનક પૂરમાં મૃત્યુઆંક સોમવાર સુધીમાં વધીને 34 પર પહોંચી ગયો છે, જ્યારે 105 લોકો હજુ પણ લાપતા હોવાનું સ્ટેટ ડિઝાસ્ટર મેનેજમેન્ટ ઓથોરિટીએ જણાવ્યું છે.

સિક્કિમના લ્હોનક ગ્લેશિયરમાં 3 ઓક્ટોબરે વાદળ ફાટ્યું હતુ. અચાનક વાદળ ફાટવાને કારણે સરોવરનો એક કાંઠો (કિનારો) તૂટી ગયો હતો. જેના કારણે તિસ્તામાં પાણીનું સ્તર વધી ગયું અને રાજ્યના ઘણા વિસ્તારો ડૂબી ગયાની ઘટના સામે આવી હતી. થોડી જ વારમાં આ કુદરતી સંકટ આફતનું રૂપ ધારણ કરી લીધું હતું. સિક્કિમમાં આ પૂરમાં ઘણા લોકોએ જીવ ગુમાવ્યા છે અને ઘણા લોકો હજુ પણ લાપતા છે. સિક્કિમ સ્ટેટ ડિઝાસ્ટર મેનેજમેન્ટ ઓથોરિટી (SSDMA) ના અહેવાલ પ્રમાણે 9 ઓક્ટોબરના રોજ સવારે 10:00 વાગ્યે સુધીની જો વાત કરીએ તો મૃત્યુઆંક 34 નોંધાયો છે. તેમજ 105 લોકો ગુમ થયા હોવાની માહિતી પણ આપી હતી.

8 ઓક્ટોબરે કુલ 33 લોકોના મોત અને 105 લોકો ગુમ થયાના અહેવાલ છે. ભારતીય સેનાના જણાવ્યા અનુસાર આજે આર્મી હેલિકોપ્ટર દ્વારા લાચેનથી બહાર કાઢવામાં આવેલા પ્રવાસીઓના પ્રથમ બેચનું મંગન જિલ્લાના રિંગિમ હેલિપેડ પર સ્વાગત કરવામાં આવ્યું હતું.