રાજકોટ મહાનગરપાલિકા દ્વારા પશ્ચિમ રેલવે તંત્ર સાથે મળીને ડો.દસ્તુરમાર્ગ ઉપર અંડર પાસ નું નિર્માણ કરવામાં આવી રહ્યું છે. વિધાનસભાની ગત ચુંટણી પૂર્વે ખાતમુહૂર્ત કરાયા બાદ એક વર્ષ સુધી આ પ્રોજેક્ટ આગળ ધપ્યો ન હતો તે દરમિયાનમાં એસ્ટીમેટ વધી જતા રેલવે તંત્રએ વધારાની રકમની માંગણી પણ કરી હતી. દરમિયાન દસ્તુરમાર્ગ અંડરપાસના અધૂરા પ્રોજેક્ટ અંગે આજકાલ દૈનિક દ્વારા લગાતાર અહેવાલો પ્રસિદ્ધ કરવામાં આવ્યા બાદ મહાકાલિકા તંત્ર જાગ્યું હતું અને રેલવેને ચુકવવા પાત્ર વધારાની રકમ ચૂકવી દેતા આ પ્રોજેક્ટનું કામ શરૂ થયું હતું. પશ્ચિમ રેલવે તંત્રએ બંબાટ ઝડપે આ અંડર પાસની કામગીરી શરૂ કરતાં હાલમાં અન્ડરપાસ માટેના બોક્સ મૂકવા સહિતની કામગીરી પૂર્ણ થઈ ગઈ છે અને આગામી ચોમાસા પૂર્વે આ અંડર પાસનું લોકાર્પણ થઈ જાય તેવી સંભાવના છે.

વિશેષમાં અંગે રાજકોટ મહાપાલિકાના સૂત્રોએ જણાવ્યું હતું કે દર ચોમાસે એસ્ટ્રોન નાલે ભરાતા વરસાદી પાણી વેળાએ અમીન માર્ગ અને હાઉસિંગ બોર્ડ રોડ વિસ્તારના રહીશોને તેમજ ત્યાંથી પસાર થતા વાહન ચલકોને ભારે હાલાકી ભોગવવી પડતી હોય છે પરંતુ હવે તેઓ દસ્તુર માર્ગ અન્ડર પાસથી નીકળી શકાશે. ન્યુ રાજકોટમાં જવા માટે લક્ષ્મીનગર અંડરપાસ, મહિલા કોલેજ બ્રિજ અને આમ્રપાલી બ્રિજ ઉપરાંત ચોથો વિકલ્પ મળશે. આ સાથે જ યાજ્ઞિક રોડ ટાગોર રોડ અને સરદાર નગર મેઈન રોડની ટ્રાફિક સમસ્યા હળવી થશે. કુલ રૂપિયા 4.18 કરોડના ખર્ચે આ પ્રોજેક્ટ હાથ ધરવામાં આવ્યો છે.