લાઠીના અકાળા રોડ પર પાણીના સંપ ખાતે મિક્સ દાળ બનાવવાના પ્રોગ્રામમાં દાળ બનાવવા બાબતે ડખ્ખો થતા યુવકને ગાળો ભાંડી શખસે છરીથી હુમલો કરતા છરીનો ઘા પડખામાં લાગી જવાથી ગંભીર હાલતમાં ભાવનગર સિવિલ હોસ્પિટલમાં ખસેડવામાં આવ્યો છે. બનાવ અંગે લાઠી પોલીસે યુવકના પિતાની ફરિયાદ પરથી હુમલો કરનાર મુન્ના ડાંગર સામે ગુનો નોંધ્યો છે.

પ્રાપ્ત વિગત મુજબ લાઠીના હરિશચંદ્રપરામાં રહેતો અને અકાળા રોડ ઉપર નવા બનતા પાણીના સંપમાં સિક્યોરિટી ગાર્ડ તરીકે નોકરી કરતો પારસ ઉર્ફે દશકો ચંદુભાઈ શેલીયા (ઉ.વ.30)નો ગત તા.8ના રાત્રીના અગ્યારેક વાગ્યે સંપ પર નોકરીએ હતો ત્યારે મિત્રો મુન્ના ડાંગર, બુધાભાઈ ડેર, મહાવીર શાહ, ભરત ચાવડા, હિત ડેર, રાહુલ સરવૈયા અને બિરજુ સહિતના ભેગા થયા હતા અને ત્યાં મિક્સ દાળ બનાવવાનો પ્રોગ્રામ રાખ્યો હતો દરમિયાન બધા પોત પોતાનું કામ કરતા હતા ત્યારે દાળ બનાવવા બાબતે પારસ ને મુન્ના ડાંગર સાથે રકજક થતા મુન્નો ગાળો આપવા લાગ્યો હતો આથી પારસએ ગાળો આપવાની ના પાડતા મુન્નાએ ઉશ્કેરાઈ છરી વડે હુમલો કર્યો હતો. છરીનો ઘા યુવકના પડખામાં ઊંડે ઘુસી જતા લોહી લુહાણ હાલતમાં પ્રથમ અમરેલી બાદ ભાવનગર સિવિલ હોસ્પિટલમાં ખસેડવામા આવ્યો હતો. બનાવના પગલે પોલીસે મુન્ના ડાંગરને સંકજા લેવા તજવીજ હાથ ધરી છે.