રાજકોટના તરઘડી નજીક રેતીના પ્લાન્ટના મશીનના પટ્ટામાં આવી જતા સગીરનું મોત નિપજયાના બનાવમાં પોલીસની તપાસમાં કામે રાખનાર પ્લાન્ટ માલિકે સગીર પર પ્રાંતીય હોવાની જાણ હોવા છતાં પોતાની વાડીએ રહેવા માટેની વ્યવસ્થા કરી આપી પોલીસને જાણ ન કરતા પડધરી પોલીસે જાહેરનામા ભંગ સબબ પ્લાન્ટ માલિક સામે ગુનો નોંધ્યો છે.

પ્રાપ્ત વિગત મુજબ પડધરીના તરઘડીયા પાસે રેતી ચારવાનો પ્લાન્ટ ધરાવતા ગોપાલ મેપાભાઇ ટોયટા (રહે-ગોકુળપુર, તરઘડી)એ પોતાના પ્લાન્ટમાં મૂળ એમપીના દિલીપસિંહ નિર્ભયસિંહ પવાર (ઉ.વ.16)ના સગીરને કામે રાખ્યો હતો. દરમિયાન ગત તા.25-4ના સગીર પ્લાન્ટના મશીન ઉપર કામ કરતો હતો ત્યારે મશીનના પટ્ટામાં આવી જતા મોત નીપજ્યું હતું. બનાવ અંગે પડધરી પોલીસને જાણ કરવામાં આવતા સગીરના મૃતદેહને પીએમ માટે સિવિલ હોસ્પિટલ ખસેડી જરૂરી કાર્યવાહી તપાસ કરતા સગીર પ્લાન્ટ માલીકની વાડીએ જ રહેતો હોય અને પર પ્રાંતીય વ્યક્તિઓને કામે રાખતા કે મકાન દુકાન ભાડે આપ્યાની પોલીસને જાણ કરવાનું જિલ્લા મેજિસ્ટ્રેટનું જાહેરનામું હોવા છતાં વાડી માલીકે વિગતો છુપાવતા પોલીસે કાર્યવાહી કરી છે.