ઉત્તર પ્રદેશમાં ફરી એકવાર ટ્રેનને પલટી મારવાનો પ્રયાસ કરવામાં આવ્યો છે. કાનપુર, ગાઝીપુર, દેવરિયા બાદ હવે રામપુર જિલ્લામાં ટ્રેન ઉથલાવવાનું ષડયંત્ર રચવામાં આવ્યું હતું.

આ ઘટના ગઈકાલ રાત્રે બની હતી. બળવંત એન્કલેવ કોલોની પાછળથી પસાર થતા બિલાસપુર રોડ રૂદ્રપુર સિટી સ્ટેશનની કિમી 43/10-11 રેલ્વે લાઇન પર ટેલિકોમનો જૂનો 7 મીટર લાંબો લોખંડનો થાંભલો રેલ્વે ટ્રેક પર રાખવામાં આવ્યો હતો. ગત રાત્રે લગભગ 11 વાગ્યે ત્યાંથી પસાર થઈ રહેલી દેહરાદૂન એક્સપ્રેસના લોકો પાયલટે થાંભલાને જોયો. આ જોઈને તેણે ઈમરજન્સી બ્રેક લગાવીને ટ્રેન રોકી હતી.

જીઆરપી એસપીએ પણ કરી હતી તપાસ

આ ઘટનાની માહિતી દહેરાદૂન એક્સપ્રેસ ટ્રેનના લોકો પાયલોટે સ્ટેશન માસ્ટર અને જીઆરપીને આપી હતી. માહિતી મળતાં જ જીઆરપી અને આરપીએફની ટીમો ઘટનાસ્થળે પહોંચી ગઈ હતી. થોડા સમય બાદ રામપુર એસપી પણ જિલ્લા પોલીસની ટીમ સાથે ઘટનાસ્થળે પહોંચ્યા અને નિરીક્ષણ કર્યું. ટીમે થાંભલાનો કબજો મેળવી રાત્રે જ શોધખોળ શરૂ કરી હતી. મુરાદાબાદના જીઆરપી એસપી વિદ્યા સાગર મિશ્રા પણ ઘટનાસ્થળે પહોંચ્યા હતા. અધિકારીઓએ પાટા પરથી થાંભલો હટાવ્યો, ત્યારબાદ ટ્રેન આગળ વધી હતી.

રેલવે ટ્રેક પર કોણે મૂક્યો પોલ?

ત્યારબાદ આજ સવારે અધિકારીઓની ટીમ ફરી ઘટનાસ્થળે પહોંચી હતી. નજીકના લોકો પાસેથી પણ માહિતી લીધી હતી. લોકોએ જણાવ્યું કે કોલોનીની પાછળથી પસાર થતી રેલ્વે લાઇન પર કેટલાક યુવકો ડ્રગ્સ લે છે. જેના કારણે આસપાસના વિસ્તારોમાં પણ નાની મોટી ચોરીઓ થતી રહે છે. આ કામ એ લોકોનું જ છે. હાલમાં જીઆરપી, આરપીએફ અને જિલ્લા પોલીસ આ થાંભલાને રાખનારા લોકોને શોધવામાં વ્યસ્ત છે.

યુપીના આ જિલ્લાઓમાં પણ ટ્રેન ઉથલાવવાનું ષડયંત્ર

રામપુર પહેલા યુપીના કાનપુર, દેવરિયા અને ગાઝીપુરમાં ટ્રેનને ઉથલાવવાનું કાવતરું ઘડવામાં આવ્યું હતું. કાનપુરમાં કાલિંદી એક્સપ્રેસને પલટી મારવા માટે રેલ્વે ટ્રેક પર સિલિન્ડર મૂકવામાં આવ્યા હતા. સ્થળ પરથી સિલિન્ડર સિવાય કાચની બોટલ, વાટ, માચીસ અને એક શંકાસ્પદ બેગ મળી આવી હતી. જ્યારે ગાઝીપુરમાં રેલવે ટ્રેક પર લાકડાનો મોટો ટુકડો રાખવામાં આવ્યો હતો. આ ગુટખા ફ્રીડમ ફાઈટર સુપર ફાસ્ટ એક્સપ્રેસના એન્જિન સાથે અથડાયું હતું. જોકે, ટ્રેન પાટા પરથી ઉતરતી બચી હતી.