ભાણવડ તાલુકાના મેવાસા ગામે રહેતા જીણાભાઈ હીરાભાઈ પરમાર નામના 62 વર્ષના અનુસૂચિત જાતિના વૃદ્ધને મેવાસા ગામના સરપંચ પદ પર રહેલા જેઠાભાઈ મારખીભાઈ નંદાણીયાએ પોતાના ઘરે ચા-પાણી પીવા માટે રકાબી અલગ રાખી હોય, તે લઈને ચા પીવાનું કહેતા આ પ્રકારે ભેદભાવ રાખી અને ફરિયાદી ઝીણાભાઈ ચાવડા પ્રત્યે ધિકારપાત્રતા જેવી ભાવનાને પ્રોત્સાહન આપવા બાબત ભાણવડ પોલીસે ઝીણાભાઈની ફરિયાદ પરથી જેઠાભાઈ નંદાણીયા સામે એટ્રોસિટી એક્ટની કલમ હેઠળ ગુનો નોંધી, આગળની તપાસ ડી.વાય.એસ.પી. હાર્દિક પ્રજાપતિએ હાથ ધરી છે. મેવાસા ગામના તલાટી મંત્રી પાસે ફરિયાદીએ અનુસૂચિત જાતિના વિકાસ કામો બાબતની માહિતી આર.ટી.આઈ. મારફતે માંગી હોવાનું પણ વધુમાં જાહેર થયું છે.

ઓખામાં માછીમારી નિયમનો ભંગ કરતા શખ્સ સામે ફરિયાદ

ઓખા મંડળના બેટ બાલાપર ખાતે રહેતા મજીદભાઈ ઈશાકભાઈ પલાણી નામના 35 વર્ષના માછીમાર યુવાને પોતાના કબજા ભોગવટાની માછીમારીની બોટ લઈ જવા અંગે નિયમ મુજબ પરવાનગી તેમજ આ માટેનું ઓનલાઈન ટોકન ન મેળવી તેમજ હોળીના રજીસ્ટ્રેશનના કાગળો સાથે ન રાખીને માછીમારી કરીને પરત આવી જતા આ પ્રકરણ અંગે ઓખા મરીન પોલીસ મથકમાં માછીમાર મજીદભાઈ પલણી સામે ગુજરાત ફિશરીઝ એક્ટની કલમ હેઠળ ગુનો નોંધવામાં આવ્યો છે.

ભાણવડમાં વિદેશી દારૂના જથ્થા સાથે એક શખ્સ ઝબ્બે: સપ્લાયરની શોધખોળ

ભાણવડથી આશરે 14 કિલોમીટર દૂર ગડુ ગામના પાટીયા નજીકથી પોલીસે વિદેશી દારૂની છ બોટલ તથા મોટરસાયકલ મળી, કુલ રૂપિયા 27,400 ના મુદ્દામાલ સાથે રાણપર ગામના ડાયા ટપુ ચાવડા (ઉ.વ. 20) ને ઝડપી લીધો હતો. આરોપી ડાયા ચાવડાને દારૂ આપનાર રણપર ગામનો લાખા ટપુ ચાવડા પોલીસને હાથ ન લાગતા ભાણવડ પોલીસે પ્રોહીબીશન એક્ટ મુજબ ગુનો આગળની તપાસ હાથ ધરી છે.