બીજિંગે ઈતિહાસમાં પહેલીવાર દક્ષિણ ચીન સાગરના પ્રવેશદ્વાર પર કાયમી અવરોધકો સ્થાપિત કર્યા છે. સેટેલાઈટ ઈમેજ દ્વારા થયેલા ખુલાસા મુજબ, ચીને સ્કારબોરો શોલ (Scarborough Shoal) નજીક પોતાના જહાજો અને તરતા અવરોધકો તૈનાત કરીને આ માર્ગ પર પોતાનું એકહથ્થુ શાસન સ્થાપવાનો પ્રયાસ શરૂ કર્યો છે. આ એવો રસ્તો છે જ્યાંથી સમગ્ર વિશ્વનો આશરે 33 ટકા દરિયાઈ વ્યાપાર પસાર થાય છે.

સેટેલાઈટ ઈમેજમાં થયો મોટો ખુલાસો
'રોયટર્સ' દ્વારા જાહેર કરવામાં આવેલી સેટેલાઈટ તસવીરોમાં સ્પષ્ટ દેખાય છે કે ચીને એન્ટ્રન્સ ગેટ પર આધુનિક બેરિકેડિંગ કરી દીધું છે. ચીને એક વિશાળ જહાજ, ચાર માછીમારી નૌકાઓ અને આશરે 352 મીટર લાંબો અવરોધક પટ્ટો તૈનાત કર્યો છે. આ અવરોધકો એવી રીતે ગોઠવવામાં આવ્યા છે કે ચીનની દેખરેખ વિના કોઈપણ જહાજ આ વિસ્તારમાંથી પસાર થઈ શકે નહીં.

પાણીની અંદર પણ ચીનનું 'ચક્રવ્યૂહ'
ફિલિપાઈન કોસ્ટ ગાર્ડના પ્રવક્તા જે ટેરિએલાએ ગંભીર દાવો કર્યો છે કે ચીને માત્ર સપાટી પર જ નહીં, પણ પાણીની અંદર પણ કડક સુરક્ષા ગોઠવી છે. ચીને આ વિસ્તારમાં પાણીની નીચે 6 સબમરીન તૈનાત કરી છે. ફિલિપાઈન્સ લાંબા સમયથી આ વિસ્તાર પર પોતાનો દાવો કરતું આવ્યું છે, પરંતુ ચીને હવે તેને સંપૂર્ણપણે પોતાના નિયંત્રણમાં લેવાની પ્રક્રિયા તેજ કરી છે.

દુનિયા માટે આ રસ્તો કેમ છે જીવનરેખા?
દક્ષિણ ચીન સાગર એ વૈશ્વિક સપ્લાય ચેઈનનો મુખ્ય આધાર છે.

વ્યાપારિક મહત્વ: સિંગાપોર, જાપાન, ચીન, તાઈવાન અને ફિલિપાઈન્સ જેવા દેશોનો મોટાભાગનો વિદેશી વ્યાપાર આ માર્ગે જ થાય છે.

કૃત્રિમ ટાપુઓ: ચીને અગાઉ અહીં કૃત્રિમ ટાપુઓ બનાવીને સૈન્ય અડ્ડાઓ સ્થાપ્યા હતા, પરંતુ હવે પ્રવેશદ્વાર બંધ કરીને તે સમગ્ર સાગરને પોતાની 'ખાનગી મિલકત' બનાવવાની દિશામાં આગળ વધી રહ્યું છે.

આંતરરાષ્ટ્રીય કાયદાનું ઉલ્લંઘન
વર્ષ 2016માં આંતરરાષ્ટ્રીય અદાલતે (Permanent Court of Arbitration) ફિલિપાઈન્સના પક્ષમાં ચુકાદો આપતા સ્પષ્ટ કહ્યું હતું કે આ ટાપુઓ પર ચીનનો કોઈ ઐતિહાસિક અધિકાર નથી. તેમ છતાં, ચીન આ આદેશને ફગાવીને સતત દબાણ વધારી રહ્યું છે. નિષ્ણાતો માને છે કે જો આ માર્ગ સંપૂર્ણપણે બ્લોક થશે, તો વૈશ્વિક સ્તરે મોંઘવારી વધશે અને સપ્લાય ચેઈન ખોરવાઈ જશે, જેનાથી દુનિયામાં આર્થિક 'ત્રાહિમામ' પોકારાઈ શકે છે.