• અદાલત, સીઆઇડી, સાવધાન ઇન્ડિયાની અભિનેત્રીએ પતિ સામે નોંધાવી ફરિયાદ
• અભિનેત્રીએ બાળકના જન્મ બાદ બોયફ્રેન્ડ સાથે ગત મહિને જ લગ્ન કર્યા હતા

ટીવીના ક્રાઇમ શો અદાલત, સીઆઈડી, સાવધાન ઈન્ડિયા, ક્રાઈમ એલર્ટ જેવા શોમાં દેખાઈ ચૂકેલી એક્ટ્રેસ ચંદ્રિકા સાહાનાએ પતિ અમન મિશ્રા સામે દોઢ વર્ષના માસુમ પુત્રને પછાડીને ઇજા પહોંચાડવાની ફરિયાદ નોંધાવી છે. અમન સામે આરોપ છે કે તેણે બેડરૂમમાં ફ્લોર પર તેમના 15 મહિનાના બાળકને પછાડી લોહીલુહાણ કરી દીધું. અહેવાલ મુજબ જ્યારે એક્ટ્રેસ ચંદ્રિકાએ આ બાળકને તેના ઘરમાં ઈજાગ્રસ્ત પડેલું જોયું તો તે સીસીટીવી રેકોર્ડિંગ લઈને પોલીસ પાસે પહોંચી હતી.

 મલાડમાં રહેતી એક્ટ્રેસ સાહાએ પોલીસને ઘટનાની સંપૂર્ણ માહિતી આપી હતી. તેણે પોલીસને જણાવ્યું કે તેનો પતિ અમન મિશ્રા આ બાળકના જન્મથી ખુશ નહોતો. શુક્રવારે બાળક બેડરૂમમાં ખૂબ રડતું હતું અને તેના શરીર પર ઈજાના નિશાન હતા. અભિનેત્રીએ પહેલા તો બાળકને હોસ્પિટલમાં દાખલ કરાવ્યું અને પછી બાળકના રૂમના સીસીટીવી ફૂટેજ ચેક કર્યા. અભિનેત્રીએ જોયું કે પતિએ બાળકને જમીન પર ત્રણ વાર પછાડ્યું હતું.

એક્ટ્રેસે પોલીસને જણાવ્યું કે અમન સાથેની મુલાકાત બાદ તેઓ બંને વચ્ચે અફેર શરૂ થયું હતું. પછી તેને એ વાતની જાણ થઈ કે તે પ્રેગ્નેન્ટ છે. અમન ઈચ્છતો હતો કે ચંદ્રિકા ગર્ભપાત કરાવે, પરંતુ ડૉક્ટરે તેને એવું ના કરવાની સલાહ આપી હતી. આ પછી બંને વચ્ચે પ્રેગ્નન્સીના મુદ્દે વારંવાર ઝઘડા થતા હતા. બંનેએ ગયા મહિને લગ્ન કર્યા જ્યારે તેમનું બાળક 14 મહિનાનું થયું હતું.

ફરિયાદમાં અભિનેત્રીએ કહ્યું છે કે શુક્રવારે તે રસોડામાં હતી ત્યારે તેણે બાળકનો રડવાનો અવાજ સાંભળ્યો હતો. તેણે પતિને બાળકની સંભાળ લેવા કહ્યું અને જોયું કે પતિ તેને બેડરૂમમાં લઈ ગયો હતો. અભિનેત્રીએ કહ્યું કે થોડીવાર પછી તેણે તેના પુત્રનો રડવાનો અને પડવાનો અવાજ સાંભળ્યો. જ્યારે તે રૂમમાં દોડી તો તેણે જોયું કે તેનું બાળક ઈજાગ્રસ્ત હાલતમાં જમીન પર પડેલું હતું.

ચંદ્રિકા તરત જ બાળકને હોસ્પિટલ લઈ ગઈ. આ પછી શનિવારે તેણે સીસીટીવી ફૂટેજ તપાસ્યા અને તેણે જે જોયું તેના પર વિશ્વાસ ના થયો. આ પછી અભિનેત્રીએ તેના પતિ વિરુદ્ધ પોલીસ ફરિયાદ નોંધાવી હતી. પોલીસે સીસીટીવી ફૂટેજની તપાસ કરી સમગ્ર મામલે ઝીણવટભરી તપાસ શરૂ કરી છે. સીસીટીવી ફૂટેજમાં જોવા મળી રહ્યું છે કે ટીવી એક્ટ્રેસ ચંદ્રિકા સાહાનો પતિ તેમના 15 મહિનાના બાળકને બેડરૂમમાં જમીન પર પછાડી રહ્યો છે.