મિલાપનગરમાં રાત્રે કારના કાચ ફોડી,ટાયરમાં છરીના ઘા માર્યા પંચાયત ચોક પાસે આવેલા મિલાપનગરમાં રાત્રીના કારના કાચ ફોડી નાંખી અને ટાયરમાં છરીના ઘા માર્યા હતાં.જે અંગે યુવાને ફરિયાદ નોંધાવી છે.યુવાન પારકી પરિણીતા સાથે વાત કરતો હોય તેના પતિએ મારી નાખવાની અને કાર સળગાવી દેવાની ધમકી આપી હતી જેથી તેણે કારમાં નુકશાન કર્યાનું ફરિયાદમાં જણાવ્યું છે.

શહેરના યુનિવર્સિટી રોડ પર પંચાયત ચોક પાસે આવેલા મિલાપનગરમાં રહેતા નીરજસિંહ જયરાજસિંહ ઝાલા (ઉ.વ 28) દ્વારા યુનિવર્સિટી પોલીસ સ્ટેશનમાં નોંધાવવામાં આવેલી ફરિયાદમાં આરોપી તરીકે જયદીપ મહાદેવભાઇ વામજાનું નામ આપ્યું છે. યુવાને ફરિયાદમાં જણાવ્યું હતું કે, તે ડ્રાઇવિંગ કામ કરે છે અને તેની પાસે સ્વીફટ નંબર જીજે 3 બીઝેડ 4630 છે.

ગઈ તા. 6/4 રાત્રીના એકાદ વાગ્યે તે આટકોટથી સ્વીફ્ટ કાર લઈ ઘર પાસે શેરીમાં પાર્ક કરી હતી બાદમાં બપોરના ભાગીદાર સંજય રાઠોડનો ફોન આવ્યો હતો અને કહ્યું હતું કે, આપણી ગાડીના ચારેય ટાયરમાં છરીના ચેકા મારેલા છે તેમજ આગળનો કાચ પણ તૂટી ગયો છે તેવી જાણ કરી હતી.

યુવાનને જયદીપ મહાદેવભાઇ વામજાને અગાઉ તા.5/4/2025 ના બપોરના સમયે સાડા ત્રણેક વાગ્યા આસપાસ ફોન કર્યો હતો અને ગાળો બોલી જાનથી મારી નાખવાની ધમકી આપી હતી અને રસ્તામાં મળીને પતાવી દેવાની તથા ગાડી સળગાવી દેવાની તેમજ માતા પિતાને મારી નાખવાની ધમકી આપી હતી. પરંતુ આ બાબત યુવાને ધ્યાને લીધી ન હતી જ્યારે ગાડીમાં નુકસાન થયાનું માલુમ પડ્યું ત્યારે જયદીપે જ ગાડીમાં તોડફોડ કરી હોવાની શંકા ગઈ હતી. ફરિયાદમાં વધુમાં જણાવ્યું હતું કે, જયદીપની પત્ની યુવાન સાથે વાતચીત કરતી હોય જે બાબત જયદીપને પસંદ ન આવતા તેણે ફોન કરી આ ધમકી આપી હતી અને તેણે જ રાત્રિના સમયે ગાડીમાં નુકસાન કરી કાચ ફોડી નાખ્યા હોવાની શંકા દર્શાવી યુવાને આ ફરિયાદ નોંધાવી છે.