મહાનગરપાલિકાના એસ્ટેટ વિભાગ અને દબાણ હટાવ સેલની ટીમ દ્વારા ગઈકાલે શહેરના વાસણઘાટ, પથિકાશ્રમ, શાકમાર્કેટ અને તેની આજુબાજુના વિસ્તાર ઉપરાંત ઘોઘાગેટમાં અસ્થાઈ દબાણો દૂર કરાયા બાદ આજે મહાપાલિકાની ટીમે શહેરના સતત ટ્રાફિકથી ભરચક રહેતા અને લોકોની ભારે અવરજ્વર વાળા આંબાચોક વિસ્તારમાં સવારથી જ અસ્થાઈ દબાણો સામે કાર્યવાહી હાથ ધરી છે. આંબાચોક વિસ્તારના હેરીશ રોડ તરીકે ઓળખાતા મુખ્ય રોડની બન્ને સાઈડ પર ટ્રાફિક અને રાહદારીઓ માટે અડચણરૂપ ઉભી રાખવામાં આવતી નાની-મોટી લારીઓ તેમજ પાથરણા વાળાઓને હટાવી માલ-સામાન જપ્ત કરવામાં આવી રહ્યો છે. હેરીશ રોડ પર બેંકો તેમજ જૂની તિજોરી કચેરી હોવાથી વારંવાર ટ્રાફિકની સમસ્યા ઉભી થતી હોય છે. ક્યારેક પગપાળા પણ આ રોડ પરથી પસાર થવું લોકો માટે મુશ્કેલ બની જતું હોય સ્થાનિક વેપારીઓ દ્વારા અવાર-નવાર આ અંગે રજુઆતો પણ કરવામાં આવી હતી. દરમ્યાનમાં મહાપાલિકાના તત્કાલીન કમિશ્નર ઉપાધ્યાય દ્વારા ભાવનગર શહેરને દબાણ મુક્ત કરવા માટે અભિયાન શરૂ કર્યુ હતું. અને આ અભિયાન હેઠળ સ્થાનિક વિસ્તારમાં મહાપાલિકાના એસ્ટેટ વિભાગ અને દબાણ હટાવ સેલની ટીમોએ અગાઉ કાર્યવાહી હાથ ધરી હતી. પરંતુ લારીઓ લઇ ઉભા રહેતા તેમજ પાથરણાવાળાઓ તંત્રની કાર્યવાહી બાદ પુન: ગોઠવાઈ જતાં હોવાથી સમયાંતરે સ્થાનિક વિસ્તારમાં મહાપાલિકા દ્વારા કાર્યવાહી કરવામાં આવે તેવું વેપારીઓ તેમજ લોકો ઈચ્છી રહ્યા છે. મહાપાલિકા તંત્રએ આજે હાથ ધરેલી કાર્યવાહીના પગલે દબાણ કરનારાઓમાં ફફડાટ ફેલાયો છે.