ગુજરાત સરકારની કેબિનેટની ગઈકાલે મળેલી બેઠકમાં સૌરાષ્ટ્રમાં કચ્છમાં સુરેન્દ્રનગર મોરબી પોરબંદર ગાંધીધામ અને ગુજરાતમાં નવસારી વાપી આણંદ નડિયાદ મહેસાણા ને નગરપાલિકાઓમાંથી મહાનગરપાલિકાઓનો દરજ્જો આપવાનો નિર્ણય લેવાયો છે. કેબિનેટના આ નિર્ણય પછી હવે ગુજરાતમાં મહાનગરપાલિકાઓની સંખ્યા 17 થઈ ગઈ છે. ગુજરાતમાં અત્યારે અમદાવાદ વડોદરા, સુરત રાજકોટ ભાવનગર જૂનાગઢ જામનગર અને ગાંધીનગર મળીને આઠ મહાનગરપાલિકાઓ કાર્યરત હતી તેમાં વધુ નવનો ઉમેરો થયો છે. 14 વર્ષ બાદ નવી મહાનગરપાલિકાઓ માટે જાહેરાત કરવામાં આવી છે.
આ ઉપરાંત બનાસકાંઠા જિલ્લાનું વિભાજન કરી વાવ -થરાદ જીલ્લો બનાવવામાં આવ્યો છે અને તેના કારણે ગુજરાતમાં જિલ્લાઓની કુલ સંખ્યા 34 થઈ ગઈ છે. ચૂંટાયેલું માળખું વિસર્જિત કરવામાં આવશે.

કઈ મહાપાલિકામાં કોણ કમિશનર?
નવી નવ મહાનગરપાલિકાઓમાં નવા કમિશનરોની નિમણુંક પણ કરવામાં આવી છે. મોરબીમાં સ્વપ્નિલ ખરે આણંદમાં મિલિંદ બાપ્ના નડિયાદમાં મીરાંંત પરીખ વાપીમાં યોગેશ ચૌધરી મહેસાણામાં રવિન્દ્ર ખાટલે સુરેન્દ્રનગરમાં જી એચ સોલંકી નવસારીમાં દેવ ચૌધરી પોરબંદરમાં એચ.જે.પ્રજાપતિ અને ગાંધીધામમાં એમ.પી.પંડ્યાને પ્રથમ મ્યુનિસિપલ કમિશનર તરીકે મૂકવામાં આવ્યા છે.

ડેપ્યુટી કમિશનરોની પણ નિમણૂક
નવ મહાનગરપાલિકાઓમાં પ્રથમ કમિશનરોની નિમણૂક કરાયા બાદ ગઈકાલે મોડી રાત્રે મહાનગરપાલિકાઓમાં ડેપ્યુટી કમિશનરોની પણ નિમણુક કરવામાં આવી છે. નડિયાદમાં મહેન્દ્ર દેસાઈ આણંદમાં નીલાક્ષ મકવાણા મહેસાણામાં એ.બી.મંડોરી વાપીમાં આસ્થા સોલંકી નવસારીમાં ગૌરાંગ વસાણી સુરેન્દ્રનગરમાં એ. આર. ચાવડા ગાંધીધામમાં મેહુલ દેસાઈ અને પોરબંદરમાં એચ. વી. પટેલની નિમણૂક કરવામાં આવી છે. મોરબીમાં નગરપાલિકાના ચીફ ઓફિસર તરીકે જવાબદારી સંભાળતા કુલદીપસિંહ વાળાને ડેપ્યુટી મ્યુનિસીપલ કમિશનર તરીકે રીડેઝિગન્ટેડ કરવામાં આવ્યા છે