દેવભૂમિ દ્વારકા જિલ્લા આરોગ્ય કર્મચારી મંડળના ઉપક્રમે રવિવારે અત્રે ગુર્જર સુતાર જ્ઞાતિની વાડી ખાતે તેજસ્વી વિદ્યાર્થીઓના સન્માનના કાર્યક્રમનું આયોજન કરવામાં આવ્યું હતું. આરોગ્ય કર્મચારી મંડળના પ્રથમ વખત યોજવામાં આવેલા આ સરસ્વતી સન્માન સમારોહમાં કર્મચારીઓના કે.જી.થી પી.જી. સુધીના તેજસ્વી બાળકોને જાહેરમાં સન્માનિત કરવામાં આવ્યા હતા. જેમાં કર્મચારી મંડળ તેમજ ખાનગી હોસ્પિટલના ડોક્ટરો દ્વારા આ બાળકોને આકર્ષક ભેટ વડે પ્રોત્સાહિત કરવામાં આવ્યા હતા.

આ પ્રસંગે આરોગ્ય કર્મચારી મહામંડળના પ્રમુખે મંડળ દ્વારા કરવામાં આવતી વિવિધ કામગીરીઓ બાબતે સવિસ્તૃત માહિતી આપી હતી. આ કાર્યક્રમની સાથે નિવૃત્ત કર્મચારીઓને પણ આદરભેર સન્માનિત કરાયા હતા. આરોગ્ય મંડળના કારોબારી સદસ્યો દ્વારા આ સમગ્ર આયોજન માટે નોંધપાત્ર જહેમત ઉઠાવવામાં આવી હતી. જેમાં સમગ્ર જિલ્લાના આરોગ્ય કર્મચારીઓએ સહપરિવાર ઉપસ્થિત રહી, આ આયોજનની સરાહના કરી હતી.