જામનગર તાબેના દરેડ જીઆઇડીસી ફેસ-૨માં આવેલા કારખાના અને શેડના શટર તોડીને ત્રાટકેલા તસ્કરો રોકડ અને પિતળ મળી કુલ ૩.૫૫ લાખનો મુદામાલ ચોરી કરી ગયા છે. ગઇકાલે ફરીયાદ થતા પોલીસ દ્વારા તપાસ ચલાવવામાં આવી રહી છે.

લાલપુરના પીપરટોડા ગામના વતની અને હાલ રણજીતસાગર રોડ, પટેલપાર્કમાં રહેતા બ્રાસ વેપારી નિતીન દામજીભાઇ રાબડીયાએ ગઇકાલે પંચ-બીમાં અજાણ્યા શખ્સો સામે ચોરી કરી ગયાની ફરીયાદ નોંધાવી છે.

તા. ૨૦ રાત્રીના સુમારે દરેડ જીઆઇડીસી ફેસ-૨, ઇલેકટ્રીક ઝોન, પ્લોટ નં. ઇ/૬માં ફરીયાદના હિન્દુસ્તાન બ્રાસ ઇન્ડસ્ટ્રીઝ નામના કારખાનાનો ડેલો ટપીને અજાણ્યા શખ્સોઅએ અંદર પ્રવેશ કર્યો હતો, દરમ્યાન ઉપરના માળે આવેલ શેડ અને ઓફીસના શટરના તાળા તોડી નાખી આશરે ૬૦૦ કીલો પિત્તળ કિ. ૩.૧૮.૫૦૦ તથા ટેબલમાં રાખેલ ૩૨ હજાર રોકડા, અને સીસીટીવી ફુટેજનું ડીવીઆર કિ. ૫૦૦૦ મળી કુલ ૩.૫૫.૫૦૦નો મુદામાલ ચોરી કરી ગયા હતા. 
​​​​​​​
કારખાનેદારની ફરીયાદના આધારે પંચ-બીના પીઆઇ શેખ અને સ્ટાફ દ્વારા આ મામલે તપાસ ચલાવવામાં આવી રહી છે, ઠંડીની મોસમમાં તસ્કરોની રંજાડ યથાવત રહેતા કારખાનેદારો સહિતમાં રોષની લાગણી જોવા મળી રહી છે, તસ્કરો પિત્તળ અને રોકડની સાથો સાથ સીસીટીવીના ડીવીઆર પણ લઇ ગયા છે એટલે કોઇ જાણભેદુ હોવાની પણ શકયતા દર્શાવવામાં આવી રહી છે.