ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ગત તારીખ 27 ફેબ્રુઆરી થી શરૂ થયેલી ધોરણ 10,ધોરણ 12 સામાન્ય પ્રવાહ અને વિજ્ઞાન પ્રવાહની પરીક્ષાઓ હવે તેના અંતિમ ચરણમાં પહોંચી છે. મોબાઈલ સાથે પરીક્ષા ખંડમાં પ્રવેશ, કોપી કેસ અને ડમી વિદ્યાર્થીઓ ઝડપાવાના છુટાછવાયા બનાવોને બાદ કરતાં પરીક્ષા અત્યાર સુધી સારી રીતે ચાલી રહી છે. એક બાજુ પરીક્ષા હજુ ચાલુ છે ત્યાં ઉત્તરવહીઓ જુદા જુદા મૂલ્યાંકન કેન્દ્રોમાં મોકલવાની કામગીરી પણ સાથે શરૂ થઈ હોવાનું જાણવા મળે છે.

ધોરણ 10 માં આજે ગુજરાતી દ્વિતીય ભાષાનું પેપર છે. આવતીકાલની રજા પછી શનિવારે વિજ્ઞાન અને સોમવારે દ્વિતીય ભાષાને લગતા પેપરો છે અને તે સાથે ધોરણ 10 ની પરીક્ષાઓ પૂરી થઈ જશે.આવી જ રીતે ધોરણ 12 વિજ્ઞાન પ્રવાહમાં આજે રજા છે, આવતીકાલે અંગ્રેજીનું પેપર છે અને ત્યાર પછી સોમવારે ભાષાનું પેપર રાખવામાં આવ્યું છે, સવારના સત્રમાં પ્રથમ ભાષાનું પેપર અને ત્યાર પછી બીજા સત્રમાં બપોરે 03:00 વાગ્યાથી કોમ્પ્યુટર અધ્યયન (સૈધાતિક) વિષયનું પેપર છે અને તે સાથે જ સોમવારે ધોરણ 12 વિજ્ઞાન પ્રવાહમાં પણ પરીક્ષાઓ પૂરી થઈ જશે.

ધોરણ 12 સામાન્ય પ્રવાહમાં આજે ઉચ્ચતર ઉત્તર બુનિયાદી પ્રવાહમાં રજા છે. પરંતુ સામાન્ય પ્રવાહમાં ગુજરાતી અને અંગ્રેજી દ્વિતીય ભાષાનું પેપર છે. આવતીકાલે ભૂગોળ અને આંકડાશાસ્ત્રનું, શનિવારે પ્રથમ ભાષાનું પેપર છે. મંગળ, બુધ અને ગુરુવારે પણ જુદા જુદા વિષયોની પરીક્ષા રાખવામાં આવી છે અને તે જોતાં ધોરણ 12 સામાન્ય પ્રવાહની પરીક્ષાઓ તારીખ 13 માર્ચના પૂરી થશે.