દિલ્હી સરકાર તેની ઘણી સેવાઓને ફેસલેસ (રૂબરૂ સંપર્ક વિના) બનાવવા માટે કામ કરી રહી છે. આ પહેલ હેઠળ, જન્મ અને જાતિ પ્રમાણપત્રો જેવા દસ્તાવેજો માટે અરજીઓ હવે વોટ્સએપ દ્વારા કરી શકાય છે, અને પ્રમાણપત્રો સીધા મેસેજિંગ એપ પર ઉપલબ્ધ થશે. અધિકારીઓએ જણાવ્યું હતું કે વિવિધ વિભાગોમાંથી આશરે 50 સેવાઓ નક્કી કરવામાં આવી છે જેના માટે લોકો વોટ્સએપ દ્વારા અરજી કરી શકે છે.

એક વરિષ્ઠ સરકારી અધિકારીએ જણાવ્યું હતું વોટ્સએપ દ્વારા શાસન' પહેલ હેઠળ, હાલમાં જે સેવાઓ માટે ઓનલાઇન અરજી કરી શકાય છે તે એઆઈની મદદથી વોટ્સએપ પ્લેટફોર્મ પર લાવવામાં આવશે. આ પહેલનો હેતુ સરકારી સેવાઓને વધુ સુલભ, પારદર્શક અને ઝડપી બનાવવાનો છે જેથી લોકોને ઓફિસોમાં દોડાદોડ ન કરવી પડે.

અધિકારીએ જણાવ્યું હતું કે યુઝર્સ દ્વિભાષી ચેટબોટ (હિન્દી અને અંગ્રેજીમાં) સાથે વાતચીત કરી શકશે, જે તેમને જન્મ પ્રમાણપત્રો, જાતિ પ્રમાણપત્રો અને અન્ય સેવાઓ જેવા દસ્તાવેજો માટે અરજી કરવામાં, જરૂરી દસ્તાવેજો અપલોડ કરવામાં અને ફી ચૂકવવામાં મદદ કરશે.

આ પ્રોજેક્ટ માહિતી ટેકનોલોજી વિભાગ દ્વારા વિકસાવવામાં આવી રહ્યો છે. વિભાગે અગાઉની દિલ્હી સરકારના કાર્યકાળ દરમિયાન સરકારી સેવાઓની ઘરે ઘરે ડિલિવરી શરૂ કરી હતી. તેમણે કહ્યું કે આ પ્રોજેક્ટને અમલમાં મૂકવાની જવાબદારી એક ટેક કંપનીને સોંપવામાં આવશે, જેને સરકાર દ્વારા સિસ્ટમ ડિઝાઇન અને અમલમાં મૂકવા માટે નિયુક્ત કરવામાં આવશે.