જૂની મહાજન વાડી ખાતે રવિવારે ધો. 12 સુધીના વિદ્યાર્થીઓ માટે સ્પર્ધા

ખંભાળિયામાં પ્રથમ વખત રઘુવંશી જ્ઞાતિના બાળકોના સર્વાંગી વિકાસના આશય સાથે રઘુવંશી ખેલ મહોત્સવનું સુંદર આયોજન કરવામાં આવ્યું છે. આ અંતર્ગત રવિવાર તારીખ 22 મીના રોજ સવારે 8:30 વાગ્યાથી અત્રે જુની લોહાણા મહાજન વાડી ખાતે ધોરણ 1 થી 12 સુધીના વિદ્યાર્થીઓ માટે વિવિધ સ્પર્ધાઓ યોજાઈ છે.

ખંભાળિયાની જાણીતી રઘુવંશી સેવા સંસ્થા શ્રી રઘુવંશી એજ્યુકેશન એન્ડ ચેરીટેબલ ટ્રસ્ટ તેમજ દેવભૂમિ દ્વારકા જિલ્લા રઘુવંશી કર્મચારી સંગઠનના સંયુક્ત ઉપક્રમે આગામી રવિવાર તારીખ 22 મીના રોજ જ્ઞાતિના બાળકો માટે ખેલ મહોત્સવનું સુંદર આયોજન કરવામાં આવ્યું છે. જ્ઞાતિના બાળકોમાં શારીરિક રમત પ્રત્યે રૂચિ વધે તેમજ વર્તમાન સમયના સંસાધનો પ્રત્યેના અતિરેક સામે જાગૃતિ મળે તેવા ઉમદા આશય સાથે યોજાયેલા આ રમતોત્સવમાં ધોરણ 1 થી 12 ના વિદ્યાર્થીઓ માટે જુદી જુદી સ્પર્ધાઓ યોજવામાં આવી છે. જેમાં ધોરણ 1 થી 3 ના કૃષ્ણ ગ્રુપ, ધોરણ 4 થી 6 ના રામ ગ્રુપ, ધોરણ 7 થી 9 ના વિષ્ણુ ગ્રુપ તેમજ ધોરણ 10 થી 12 ના શિવ ગ્રુપમાં નોંધાયેલા વિદ્યાર્થીઓ માટે જુદી જુદી સ્પર્ધાઓ યોજાશે. આ ખેલ મહોત્સવમાં પ્રથમ, દ્વિતીય અને તૃતીય ક્રમ મેળવનારા વિદ્યાર્થીઓને ખાસ પારિતોષિક આપવામાં આવશે તેમજ ભાગ લેનારા તમામ બાળકોને પણ પ્રોત્સાહિત કરવામાં આવશે.

આ આયોજનમાં સહભાગી થઈ, અને બાળકોને પ્રોત્સાહિત કરવા જ્ઞાતિજનોને આયોજકો દ્વારા અનુરોધ કરવામાં આવ્યો છે.