બાંગ્લાદેશના નેતાઓ અને સુરક્ષા એજન્સીઓએ ગેરકાયદેસર બાંગ્લાદેશી નાગરિકોને પાછા મોકલવાની ભારતની કાર્યવાહી સામે સખત વાંધો ઉઠાવ્યો છે. બાંગ્લાદેશે તેને તેની સાર્વભૌમત્વ પર હુમલો અને રાષ્ટ્રીય સુરક્ષા માટે ખતરો ગણાવ્યો છે. હકીકતમાં ભારતે તાજેતરમાં 67 બાંગ્લાદેશી નાગરિકોને પાછા મોકલ્યા, જ્યારે 13 લોકો ભારત-બાંગ્લાદેશ સરહદની શૂન્ય રેખા પર ફસાયેલા રહ્યા હતા, જેની સામે બાંગ્લાદેશ ગીન્નાયું હતું.બાંગ્લાદેશી સૈન્યના એક વરિષ્ઠ અધિકારીએ ધમકી આપી હતી કે ભારત દ્વારા ગેરકાયદેસર નાગરિકોને ઘુસણખોરી સ્વીકાર્ય નથી અને જો જરૂર પડે તો, સેના પણ કાર્યવાહી માટે તૈયાર છે.2016માં, તત્કાલીન કેન્દ્રીય ગૃહ રાજ્યમંત્રી કિરેન રિજિજુએ રાજ્યસભામાં માહિતી આપી હતી કે લગભગ 2 કરોડ બાંગ્લાદેશી ભારતમાં ગેરકાયદેસર રીતે રહે છે. આ વર્ષે 30 એપ્રિલ સુધીમાં, બીએસએફ દ્વારા લગભગ 100 ગેરકાયદેસર બાંગ્લાદેશી નાગરિકોને બાંગ્લાદેશ બોર્ડર સિક્યુરિટી ફોર્સને સોંપવામાં આવ્યા છે. જોકે, બાંગ્લાદેશી મીડિયા અનુસાર, 7 મેથી 800 થી વધુ લોકોને બળજબરીથી સરહદ પાર મોકલવામાં આવ્યા છે, જેમાં ભારતીય નાગરિકો અને રોહિંગ્યા શરણાર્થીઓનો સમાવેશ થાય છે.

લાલમોનિરહાટમાં તણાવ, સ્થાનિક લોકોનો વિરોધ

બીજીબી અને સ્થાનિક ગ્રામજનોએ લાલમોનિરહાટ જિલ્લામાં છ અલગ અલગ સરહદી સ્થળોએથી 57 લોકોને ધકેલવાના બીએસએફના પ્રયાસને નિષ્ફળ બનાવ્યો.બાંગ્લાદેશના અખબાર ધ ડેઇલી સ્ટાર અનુસાર, મહિલાઓ અને શિશુઓ સહિત 13 લોકો ઝીરો લાઇન પર ફસાયેલા છે. ન તો તેમને બાંગ્લાદેશમાં પ્રવેશ મળી રહ્યો છે અને ન તો ભારત તેમને પાછા લઈ રહ્યું છે.

બીએસએફ અને બીજીબી વચ્ચે ફ્લેગ મીટિંગ નિષ્ફળ

લાલમોનિરહાટમાં બીજીબી બટાલિયન કમાન્ડર અબ્દુસ સલામે ધ ડેઇલી સ્ટારને જણાવ્યું હતું કે બીએસએફ પાસેથી ફ્લેગ મીટિંગની માંગ કરવામાં આવી હતી, પરંતુ કોઈ સકારાત્મક પ્રતિભાવ મળ્યો નથી. તેમણે કહ્યું કે અમે બીજીબી સાથે ઉભા છીએ અને કોઈને પણ દેશમાં બળજબરીથી પ્રવેશવા દઈશું નહીં.બીજીબીએ અગાઉ સરહદ પર વાડ કરવાના ભારતના પ્રયાસોનો વિરોધ કર્યો છે. આ વર્ષે જાન્યુઆરીમાં, બીએસએફ અને બીજીબી વચ્ચે વાડને લઈને ફરીથી વિવાદ થયો હતો. 4,096.7 કિમી લાંબી ભારત-બાંગ્લાદેશ સરહદમાંથી, અત્યાર સુધીમાં 3,232 કિમી વિસ્તારમાં વાડ કરવામાં આવી છે.

બાંગ્લાદેશમાં નવી રાજકીય પરિસ્થિતિને કારણે તણાવ વધ્યો

ઓગસ્ટ 2024 માં વડા પ્રધાન શેખ હસીનાએ દેશ છોડ્યા પછી બાંગ્લાદેશમાં ભારત વિરોધી શક્તિઓએ રાજકીય તાકાત મેળવી છે. ત્યાં એવી વાર્તા ફેલાવવામાં આવી રહી છે કે ભારતે હસીનાને સત્તામાં રાખવા માટે ટેકો આપ્યો હતો. હવે નવી સરકારમાં ભારત વિરોધી વાણી વધુ તીવ્ર બની છે.બાંગ્લાદેશની નેશનલ સિટી પાર્ટીના નેતા સરવર તુષારે જણાવ્યું હતું કે, "ભારત દ્વારા લોકોને બળજબરીથી બાંગ્લાદેશ મોકલવા એ આપણા માટે સીધો સુરક્ષા ખતરો છે. આ એક ઉશ્કેરણીજનક કાર્યવાહી છે અને આંતરરાષ્ટ્રીય કાયદાનું ઉલ્લંઘન છે.

તેમણે ભારતને તાત્કાલિક આવી પ્રવૃત્તિઓ બંધ કરવા અને બાંગ્લાદેશની સાર્વભૌમત્વનું સન્માન કરવાની માંગ કરી. અગાઉ 9 મેના રોજ, બાંગ્લાદેશના વિદેશ મંત્રાલયે આ મુદ્દા પર ભારત સામે ઔપચારિક વાંધો વ્યક્ત કર્યો હતો અને કહ્યું હતું કે ગેરકાયદેસર ઇમિગ્રન્ટ્સની વાપસી માટે નિર્ધારિત પ્રક્રિયાઓનું પાલન કરવું જોઈએ.