હિંદુઓ અને અન્ય લઘુમતીઓ વિરુદ્ધ હિંસાના મામલામાં બાંગ્લાદેશે પણ પાકિસ્તાનને પાછળ છોડી દીધું છે. કેન્દ્ર સરકારે શુક્રવારે રાજ્યસભામાં જણાવ્યું કે 8 ડિસેમ્બર સુધી બાંગ્લાદેશમાં હિંદુઓ અને અન્ય લઘુમતીઓ વિરુદ્ધ હિંસાના 2200 કેસ નોંધાયા છે. જ્યારે પાકિસ્તાનમાં ઓક્ટોબર સુધીમાં આવા કેસોની સંખ્યા 112 હતી.

બાંગ્લાદેશ અને પાકિસ્તાનમાં હિન્દુઓ પર હુમલાની ઘટનાઓ વધી રહી છે. સરકારે શુક્રવારે રાજ્યસભામાં જણાવ્યું હતું કે આ વર્ષે 8 ડિસેમ્બર સુધી બાંગ્લાદેશમાં હિંદુઓ અને અન્ય લઘુમતીઓ વિરુદ્ધ હિંસાના 2,200 કેસ નોંધાયા છે.

વિદેશ રાજ્ય મંત્રી કીર્તિ વર્ધન સિંહે માનવાધિકાર સંગઠનોના ડેટાને ટાંકીને રાજ્યસભામાં એક લેખિત જવાબમાં કહ્યું કે આ વર્ષના ઓક્ટોબર સુધીમાં પાકિસ્તાનમાં હિંદુઓ અને અન્ય લઘુમતીઓ વિરુદ્ધ હિંસાના 112 કેસ નોંધાયા છે. ગયા વર્ષે બાંગ્લાદેશમાં લઘુમતીઓ વિરુદ્ધ હિંસાની 302 ઘટનાઓ નોંધાઈ હતી જ્યારે પાકિસ્તાનમાં વર્ષ 2023માં આવી 103 ઘટનાઓ નોંધાઈ હતી.

અન્ય દેશોમાં નથી નોંધાયા હિંસાના કેસ 

મંત્રીએ કહ્યું કે પાકિસ્તાન અને બાંગ્લાદેશ સિવાય અન્ય પડોશી દેશોમાં લઘુમતીઓ વિરુદ્ધ હિંસાના કોઈ કેસ નોંધાયા નથી. મંત્રીએ વધુમાં જણાવ્યું હતું કે, 'ભારત સરકારે પાકિસ્તાનને ધાર્મિક અસહિષ્ણુતા, સાંપ્રદાયિક હિંસા, લઘુમતી સમુદાયો પર હુમલા રોકવા અને તેમની સુરક્ષા સુનિશ્ચિત કરવા પગલાં લેવા વિનંતી કરી છે.