ભારતીય બેડમિન્ટન સ્ટાર પીવી સિંધુ સુરક્ષિત રીતે ભારત પરત ફરી છે. બે દિવસ પહેલા ઈરાની ડ્રોન હુમલા દરમિયાન સિંધુ દુબઈ ઇન્ટરનેશનલ એરપોર્ટ પર ફસાઈ ગઈ હતી. તે ઓલ ઈંગ્લેન્ડ ઓપન રમવા માટે બર્મિંગહામ જઈ રહી હતી. સિંધુએ દુબઈથી કનેક્ટિંગ ફ્લાઇટ લીધી હતી.

શનિવારે, 30 વર્ષીય સિંધુએ સોશિયલ મીડિયા પ્લેટફોર્મ પર એક વીડિયો પોસ્ટ કર્યો હતો જેમાં પરિસ્થિતિનું વર્ણન કરવામાં આવ્યું હતું. તેણીએ બતાવ્યું હતું કે કેવી રીતે મોટી સંખ્યામાં મુસાફરો એરપોર્ટ પર ફસાયેલા હતા, ભયનું વાતાવરણ અનુભવી રહ્યા હતા.

મધ્ય પૂર્વમાં વધતા તણાવ અને સંઘર્ષને કારણે આ પરિસ્થિતિ વધુ વણસી હતી, જેના કારણે દુબઈના હવાઈ માર્ગ પર વ્યાપક ફ્લાઇટ રદ કરવામાં આવી હતી અને મુસાફરોની મુસાફરીમાં નોંધપાત્ર વિક્ષેપો સર્જાયા હતા.

સિંધુએ ટ્વિટ કર્યું હતું કે છેલ્લા કેટલાક દિવસો તેના માટે અત્યંત તણાવપૂર્ણ અને અનિશ્ચિત રહ્યા હતા, પરંતુ તે હવે બેંગલુરુમાં સુરક્ષિત છે અને ભારતમાં પાછા આવીને રાહત અનુભવે છે. તેણીએ આ મુશ્કેલ સમયમાં મદદ કરવા બદલ દુબઈ એરપોર્ટ અધિકારીઓ, ભારતીય હાઇ કમિશન અને સ્થાનિક સહાયક કાર્યકરોનો આભાર માન્યો હતો.

ઓલ ઈંગ્લેન્ડ ઓપન આજથી શરૂ થવાનું છે. સિંધુ ઓલ ઈંગ્લેન્ડ ઓપનમાં ભાગ લઈ શકશે નહીં. તે દુબઈથી ભારત પરત ફરી છે. બેડમિન્ટન એસોસિએશન ઓફ ઈન્ડિયાના સેક્રેટરી સંજય મિશ્રાએ પુષ્ટિ આપી છે કે પીવી સિંધુ ઓલ ઈંગ્લેન્ડ ચેમ્પિયનશિપમાં નહીં રમે. તેમણે કહ્યું કે સિંધુ આવતા અઠવાડિયે યોજાનારી સ્વિસ ઓપન સુપર-300 ટુર્નામેન્ટમાં ભાગ લેશે.