રાજકોટ શહેર ભાજપ પ્રમુખ ડો.માંધવભાઇ દવેએ રાજકોટ મહાપાલિકાના ભાજપના કોર્પોરેટરોને સોશ્યલ મીડિયા પોસ્ટમાં વિવેક નહીં ચુકવા ટકોર કરી છે.બનાવ અંગે પ્રાપ્ત વિગતો મુજબ રાજકોટ બીજેપી નામના વોટ્સએપ ગ્રૂપમાં ગત રાત્રે અચાનક જ એક પોસ્ટ મૂકવામાં આવી હતી અને તેમાં લખવામાં આવ્યું હતું કે, ૨૪૦ સીટમાં આટલું જ યુદ્ધ જોવા મળે, વધુ જોવું હોય તો ૪૦૦ સીટ આપવી પડે. આ પોસ્ટ વોર્ડ નં.૧૦ના ભાજપના કોર્પોરેટર ચેતન સુરેજાએ મૂકી હતી જે સંદર્ભે આજે સવારે શહેર ભાજપ પ્રમુખ મધવભાઈ દવેએ સુરેજાનો ખુલાસો પૂછ્યો હતો.

આ અંગે ભાજપના કોર્પોરેટર ચેતનભાઇ સુરેજાનો સંપર્ક કરતા તેમણે જણાવ્યું હતું કે તેમણે આવી પોસ્ટ ટેક્સ્ટ કરી ન હતી પરંતુ અન્ય ગ્રુપમાં આવેલી પોસ્ટને ઇમોજી એડ કરીને ફોરવર્ડ કરી હતી.

જ્યારે શહેર ભાજપ પ્રમુખ ડો.માધવભાઇ દવેએ જણાવ્યું હતું કે આ બાબતે ખુલાસો પૂછ્યો હતો અને તેમણે પક્ષ સમક્ષ ભૂલ સ્વીકારી માફી માંગી છે આથી હવે કોઇ વિશેષ પગલાં લેવાના થતા નથી ભવિષ્યમાં આવી પોસ્ટ કોઇ પણ કોર્પોરેટર કે પક્ષના હોદ્દેદાર ફોરવર્ડ ન કરે તે માટે સોશ્યલ મીડિયા પોસ્ટમાં વિવેક ન ચુકવા સર્વને ટકોર કરાઇ છે.

વોર્ડના હિતશત્રુએ સ્ક્રીન શોટ વાયરલ કર્યાની ચર્ચા

પક્ષના વર્તુળોમાં ચર્ચાતી વિગતો મુજબ પક્ષના ગ્રુપમાં થયેલી ફોરવર્ડ કરાયેલી પોસ્ટનો સ્ક્રીન શોટ બહાર કેવી રીતે પહોંચ્યો ? તે અંગે પણ ચર્ચા જાગી છે. દરમિયાન વોર્ડ નં.૧૦માં સક્રિય ભાજપના જ એક હિત શત્રુએ આ મામલો ચગાવ્યો હોવાનું સામે આવ્યાની કાનોકાન ચર્ચા છે.