ખંભાળિયાનો ઘી ડેમ 80 ટકા જેટલો ભરાયો

દેવભૂમિ દ્વારકા જિલ્લાના જુદા જુદા વિસ્તારોમાં છેલ્લા બે- ત્રણ દિવસથી અતિભારે વરસાદ વરસ્યો હતો. જેને પગલે જિલ્લાના અનેક નદી, તળાવ અને ડેમો છલકાઈ ઓવરફ્લો થયા હતા.

આના અનુસંધાને તંત્ર દ્વારા જિલ્લાના કલ્યાણપુર તાલુકામાં આવેલ શેઢા ભાડથરી ડેમ સહિતની મુલાકાત લઈ નીચાણવાળા વિસ્તારોમાં આવેલા ગામો કાનપર શેરડી, ચપર, ચુર, માંગરીયા, હરીપર ગામના નાગરિકોને નદીના પટમાં અવર-જવર ન કરવા તેમજ સાવચેતી રાખવા અવગત કરવામાં આવ્યા હતા.

આ વચ્ચે તંત્ર દ્વારા રવિવારે જાહેર કરવામાં આવેલી વધુ વિગત મુજબ ભાણવડ તાલુકાનો મીણસાર ડેમ 80 ટકા તેમજ કબરકા ડેમ હાલ મહદ અંશે ભરાઈ ગયો હોવાથી ડેમના નીચાણવાળા વિસ્તારોમાં ન જવા સ્થાનિકોને તંત્ર દ્વારા એલર્ટ જાહેર કરવામાં આવ્યું છે.

જિલ્લાના મોટા ગણાતા અને ખંભાળિયાના મહત્વના એવા ઘી ડેમની સપાટી પણ 80 ટકાથી વધુ ભરાઈ જતા લોકોને સાવચેત કરવામાં આવ્યા છે.