અમેરિકામાં વધુ એક વિમાની દુર્ઘટના સામે આવી છે અને પેન્સિલવેનિયા ના ઉપનગર વિસ્તારમાં એક પ્લેન ક્રેશ થઈ અગનગોળો બની ગયું હતું અને સળગતું વિમાન નીચે ઉભેલી કાર્સ પર પડતા વાહનોને પણ નુકસાન થયું હતું. જો કે સદનસીબે વિમાનમાં મુસાફરી કરી રહેલા તમામ 5 મુસાફરનો બચાવ થયો હતો.

અમેરિકાના પેન્સિલવેનિયામાં 5 લોકો સાથેનું એક નાનું વિમાન ક્રેશ થયું.અધિકારીઓએ જણાવ્યું હતું કે પેન્સિલવેનિયાના ઉપનગરીય વિસ્તારમાં એરપોર્ટની બહાર પાંચ લોકો સાથેનું એક વિમાન ક્રેશ થયું હતું.એસોસિએટેડ પ્રેસના અહેવાલ મુજબ, આગ લાગી હોવા છતાં, પાંચેય મુસાફરો બચી ગયા, જોકે તેમની સ્થિતિ વિશે કોઈ માહિતી જાહેર કરવામાં આવી નથી. વિમાનમાં સવાર તમામ લોકોને સ્થાનિક હોસ્પિટલોમાં લઈ જવામાં આવ્યા હતા. જ્યારે ઘણા વાહનોનો નાશ થયો હતો. આ અકસ્માત બપોરે ૩ વાગ્યે ફિલાડેલ્ફિયાથી લગભગ ૭૫ માઈલ (૧૨૦ કિમી) પશ્ચિમમાં આવેલા મેનહેમ ટાઉનશીપમાં આવેલા બ્રેથ્રેન ગામ પાસે થયો હતો.

નજીકમાં વાહન ચલાવતા એક પ્રત્યક્ષદર્શી બ્રાયન પિપકિનએ એસોસિએટેડ પ્રેસને જણાવ્યું કે વિમાન અચાનક ડાબી બાજુ વળી ગયું અને પછી નીચે પડી ગયું. આ પછી તે તરત જ આગના ગોળામાં ફેરવાઈ ગયું. પિપકીને તરત જ 911 પર ફોન કર્યો અને ઘટનાસ્થળે પહોંચ્યા. તેમના વિડીયો ફૂટેજમાં કાટમાળમાંથી કાળો ધુમાડો નીકળતો અને ઘણી કારમાં આગ લાગી હતી. આ અકસ્માતમાં ત્રણ માળની રહેણાંક ઇમારત માંડ માંડ બચી ગઈ.

ફાયર બ્રિગેડની ગાડી ઘટનાસ્થળે દોડી

માહિતી મળ્યા પછી, લેન્કેસ્ટર એરપોર્ટથી એક ફાયર એન્જિન થોડીવારમાં અકસ્માત સ્થળે પહોંચી ગયું. આ પછી વધારાની ઇમરજન્સી ટીમો પણ આવી પહોંચી. તીવ્ર ગરમી અને ધુમાડાને કારણે, અગ્નિશામકોને આગ પર કાબુ મેળવવો મુશ્કેલ બની રહ્યો હતો. આ અકસ્માતમાં લગભગ એક ડઝન વાહનોને નુકસાન થયું હતું.

અકસ્માતની તપાસ કરવામાં આવશે

ફ્લાઇટઅવેર અનુસાર, વિમાન લેન્કેસ્ટર એરપોર્ટથી ઉડાન ભરવાનું હતું અને સ્પ્રિંગફીલ્ડ, ઓહિયો જવાનું હતું. ફેડરલ એવિએશન એડમિનિસ્ટ્રેશનએ કહ્યું કે તે અકસ્માતની તપાસ કરશે. જાન્યુઆરીથી અમેરિકામાં વિમાન અકસ્માતોમાં વધારો થયો છે.