જીવન બચાવવાની આશા સાથે રાંચી એરપોર્ટથી ઉડેલી એક એર એમ્બ્યુલન્સ સોમવારે સાંજે ઝારખંડના ચતરા જિલ્લાના સિમરિયામાં ક્રેશ થઈ હતી. વિમાન ટેકઓફ થયાના થોડા જ સમયમાં તેનો એર ટ્રાફિક કંટ્રોલ (ATC) અને રડાર સાથેનો સંપર્ક તૂટી ગયો હતો. એરપોર્ટ ડાયરેક્ટરે આ ભયાનક અકસ્માતની પુષ્ટિ કરી છે. હાલમાં સ્થાનિક વહીવટીતંત્ર અને પોલીસની ટીમો ગાઢ જંગલોમાં રાહત અને બચાવ કામગીરીમાં વ્યસ્ત છે.

દુર્ઘટના અને જાનહાનિની વિગત
આ એર એમ્બ્યુલન્સ ચતરા જિલ્લાના સિમરિયા પોલીસ સ્ટેશન હેઠળના કરમાટાંડ ગામ પાસે આવેલા ગીચ જંગલોમાં તૂટી પડી હતી. વિમાનમાં સવાર 41 વર્ષીય દર્દી સંજય કુમારનું આ અકસ્માતમાં મોત નીપજ્યું છે. સંજય કુમાર ગંભીર રીતે દાઝી ગયા હોવાથી તેમને વધુ સારી સારવાર માટે એર એમ્બ્યુલન્સ દ્વારા દિલ્હી લઈ જવામાં આવી રહ્યા હતા, પરંતુ નિયતિને કંઈક બીજું જ મંજૂર હતું.

વિમાનમાં કોણ-કોણ સવાર હતું?
દુર્ઘટના સમયે વિમાનમાં કુલ 7 લોકો સવાર હતા. જેમાં દર્દી ઉપરાંત મેડિકલ સ્ટાફ અને પાયલોટ્સનો સમાવેશ થાય છે. મુસાફરોની વિગત નીચે મુજબ છે:

દર્દી: સંજય કુમાર (મૃતક)

મેડિકલ સ્ટાફ: ડૉ. વિકાસ કુમાર ગુપ્તા અને પેરામેડિક સચિન કુમાર મિશ્રા

દર્દીના સંબંધીઓ (એટેન્ડન્ટ): અર્ચના કુમારી અને ધ્રુવ કુમાર

પાયલોટ્સ: મુખ્ય પાયલોટ કેપ્ટન વિવેક વિકાસ ભગત અને કો-પાયલોટ કેપ્ટન સવરાજદીપ સિંહ

તપાસ અને આગામી કાર્યવાહી
અકસ્માતની જાણ થતા જ ચતરા જિલ્લા પ્રશાસન અને પોલીસની ટીમો ઘટનાસ્થળે પહોંચી ગઈ છે. જંગલ વિસ્તાર હોવાથી બચાવ કામગીરીમાં થોડી મુશ્કેલીઓનો સામનો કરવો પડી રહ્યો છે. રાજ્ય સરકાર અને ડાયરેક્ટરેટ જનરલ ઓફ સિવિલ એવિએશન (DGCA) એ આ સમગ્ર મામલે ઉચ્ચ સ્તરીય તપાસના આદેશ આપ્યા છે. વિમાન કયા ટેકનિકલ કારણોસર રડાર પરથી ગાયબ થયું અને ક્રેશ થયું, તે તપાસ બાદ જ સ્પષ્ટ થશે.