રાજયભરમાં જીએસટીએન નંબર લઇ બોગસ પેઢીઓ ઉભી કરી કરોડોની આઇટીસી મેળવી રાતોરાત કરોડપતિ થવાનો ધીકતો ધંધો ચાલી રહ્યો છે. આ કૌંભાડ પકડવા માટે સ્ટેટ જીએસટીની ટીમો ચૂપકીદી સેવાતા અને આંખ આડા કાન કરતા  સેન્ટ્રલ જીએસટી અને ડીરેકટોરેટ જનરલ ઓફ જીએસટી ઇન્ટેલીજન્સ(ડીજીજીઆઇ)ની ટીમો સક્ીય બની છે.

 તાજેતરમાં ડીજીજીઆઇ અમદાવાદ ઝોનલ યુનીટે બોગસ પેઢીઓ ઉભી કરી ખોટી રીતે અધધ..રૂ.૭૮ કરોડની ઇનપુટ ટેકસ ક્રેડીટ મેળવવાનું કૌંભાડ પકડી પાડી અમદાવાદના રહેવાસી અને કૌંભાડના મુખ્ય સૂત્રધાર પ્રભાત સોમાણીની ધરપકડ કરી હતી. આટલું જ નહીં ડીજીજીઆઇ બોગસ પેઢીઓ બનાવનાર પ્રભાત સોમાણીની પૂછપરછમાં આ કૌંભાડનું પગેરૂ જામનગરમાં પણ નીકળ્યું છે. આથી ડીજીજીઆઇની ટીમે જામનગરમાં ધામા નાખ્યા છે.


શહેરમાં હાથ ધરવામાં આવેલી તપાસમાં બોગસ એટલે કે ફકત કાગળ પર પેઢીઓ ઉભી કરી આ ત્રણેય પેઢીમાં કરોડો રૂપિયાના ખોટા ઇન્વોઇસીંગ કરી ગેરકાયદે રીતે મસમોટી રકમની ઇનપુટ ટેકસ ક્રેડીટની લેવડદેવડ કરવામાં આવી હોવાનો ઘટસ્ફોટ થયો છે. તપાસમાં જામનગરમાં નોંધાયેલી ત્રણેય પેઢી ફકત કાગળ પર ચાલતી હોવાનું પણ બહાર આવ્યું છે. જો કે, ડીજીજીઆઇ દ્રારા પેઢી કે તેના માલીકના નામ તથા કેટલી રકમની આઇટીસી ખોટી રીતે મેળવવામાં આવી છે તે જાહેર કરવામાં ન આવતા અનેક સવાલ ઉઠ્યા છે. 


અત્રે નોંધનીય છે કે, તાજેતરમાં તાજેતરમાં સીબીઆઇસીની ખાસ દેશવ્યાપી ડ્રાઇવમાં રાજકોટ કમિશનોરેટમાં જામનગરમાં અધધ..૪૭૯ શંકાસ્પદ જીએસટીએન એકટીવ હોવાનો ચોંકાવનારો ઘટસ્ફોટ થયો છે. ત્યારે અમદાવાદના કરોડોના જીએસટી ચોરીક કૌંભાડમાં પણ જામનગરની ૩ બોગસ પેઢીનો પર્દાફાશ થતા જામનગર બોગસ બીલીંગનું હબ બન્યાનો વધુ એક પુરાવો મળ્યો છે. આટલું જ નહીં એક પછી એક કૌંભાડ પરથી ડીજીજીઆઇ અને સેન્ટ્રલ જીએસટીની ટીમો પડદો ઉચકતા સ્થાનિક અધિકારીઓની કામગીરી સામે સળગતા સવાલ ઉઠયા છે. ​​​​​​​