અકસ્માતના આ બનાવની જાણવા મળતી વિગતો મુજબ,ગોંડલમાં જામવાડી જીઆઇડીસીમાં કેપીટલ મીલની ઓરડીમાં રહેતા સાધાનાબેન વિશ્ર્વનાથભાઇ મરદાને(ઉ.વ ૨૯) ગઇકાલે સવારે રાબેતા મુજબ ગોંડલ હાઇવે પર કનૈયા હોટલ પાસે મુકેશ વિરજીભાઇ મકવાણાની રિક્ષા નં.જીજે ૩ સીટી ૪૨૪૮ માં બેસી ગુંદાળા રોડ પર આવેલા અવિરત કારખાને જવા માટે નિકળ્યા હતાં.આ સમયે મનિષાબેન સરદભાઇ ઝાયભાઇ, મીરાબેન સતિષભાઇ રાખ સહિનાઓ પણ સાથે હતાં.દરમિયાન રિક્ષા ગુંદાળા રોડ પર આવેલ ઓસ્ટન સિનેમા પાસે પહોંચતા રિક્ષાચાલક મુકેશ મકવાણાએ બેદરકારીપૂર્વક પૂરપાટ ઝડપે ઓવરટેક કરવા માટે કાવો મારતા સામેથી આવતા ટેમ્પો સાથે અથડાઇ હતી.જેમાં જેમાં સાધનાબેનને ગંભીર ઇજા પહોંચી હતી.જયારે તેની સાથેના અન્ય મહિલાને પણ ઇજા પહોંચી હતી.

અકસ્માતની આ ઘટનાને લઇ અહીં એકત્ર થયેલા લોકોએ ૧૦૮ને જાણ કરતા ત્રણેયને સારવાર માટે ગોંડલ સરકારી હોસ્પિટલ ખસેડવામાં આવતા અહીં ફરજ પરના તબીબે જોઇ તપાસી સાધનાબેનને મૃત જાહેર કર્યા હતાં.અકસ્માતમાં મોતને ભેટનાર પરિણીતા મૂળ મહારાષ્ટ્રના લુલડાના જિલ્લાની વતની છે.અને બે માસ પૂર્વે જ પેટીયું રળવા અહીં આવ્યા હતાં. પરિણીતાને સંતાનમાં એક પુત્ર ઉમેશ(ઉ.વ ૧૨) છે.તેમના પતિ વિશ્ર્વનાથભાઇ જામવાડી જીઆઇડીસીમાં ગાડી લોડીંગ-અનલોડીંગનું કામ કરે છે. બનાવ અંગે મૃતકના પતિ વિશ્ર્વનાથભાઇની ફરિયાદ પરથી ગોંડલ બી ડિવીઝન પોલીસે રિક્ષાચાલક મુકેશ વિરજીભાઇ મકવાણા સામે ગુનો નોંધી કાયદેસરની કાર્યવાહી કરી હતી.