અભિષેક શર્મા (100)ની તોફાની સદીની મદદથી ભારતીય ટીમે બીજી T20 આંતરરાષ્ટ્રીય મેચમાં ઝિમ્બાબ્વેને 100 રનથી હરાવ્યું. આ સાથે શુભમન ગીલની આગેવાની હેઠળની ભારતીય ટીમે પાંચ મેચોની શ્રેણી 1-1થી બરાબર કરી લીધી છે. હરારેમાં રમાયેલી મેચમાં ભારતીય બેટ્સમેનો બાદ બોલરોએ પોતાનો દબદબો બતાવીને યજમાન ટીમને સંપૂર્ણ રીતે મેચથી દૂર રાખી હતી.

આ જીત સાથે ભારતીય ટીમે પાંચ મેચની T20 ઈન્ટરનેશનલ શ્રેણી 1-1થી બરાબર કરી લીધી છે. તમને યાદ અપાવી દઈએ કે શનિવારે રમાયેલી પ્રથમ મેચમાં ભારતને 13 રને હારનો સામનો કરવો પડ્યો હતો. ભારત અને ઝિમ્બાબ્વે વચ્ચે સીરીઝની ત્રીજી T20 ઈન્ટરનેશનલ મેચ બુધવારે રમાશે.

ભારતીય બોલરોનું શાનદાર પ્રદર્શન
235 રનના પહાડી સ્કોરનો પીછો કરવા આવેલી ઝિમ્બાબ્વેની ટીમ મેચમાં ક્યારેય જીત તરફ જતી જોવા મળી ન હતી. તેણે પાવરપ્લેમાં 46 રનના સ્કોર પર તેની ટોપ-4 વિકેટ ગુમાવી દીધી હતી. ભારતીય ફાસ્ટ બોલરો મુકેશ કુમાર અને અવેશ ખાને ટોપ-4 બેટ્સમેનોનો પેવેલિયન ભેગા કરી દિધા હતા. મુકેશે ઈનોસન્ટ કૈયા (4) અને બ્રાયન બેનેટ (26)ને બોલ્ડ કર્યા હતા.