રાજયના પોલીસ વડા દ્રારા એસીબીના ડીવાયએસપી કૃષ્ણકુમારસિંહ એચ.ગોહિલને ડીજીપી કમન્ડાશન ડીસ્ક–૨૦૨૩ સાથે સન્માનિત કરાયા છે, ગોહિલને તેમની ફરજ નિપુણતા, કાર્યશૈલીને લઈને અગાઉ પણ પ્રશંસા પત્રો, એવોર્ડ મળી ચૂકયા છે. એસીબી તથા પોલીસ વર્તુળો દ્રારા તેમને ડીસ્ક–૨૦૨૩ બદલ શુભેચ્છા અપાઈ છે.
એસીબી ડીવાયએસપી ગોહિલે પોલીસ ડિપાર્ટમેન્ટમાં તેમની કારકિર્દી બે દાયકા પૂર્વે પીએસઆઈથી સ્ટાર્ટ કરી હતી. રાજકોટ રૂરલમાં એલસીબીમાં તેમને ફરજકાળ દરમિયાન જસદણ પંથકમાં વૃધ્ધાને સળગાવી દઈને પોતાના આપઘાતની સ્ટોરી ઉભી કરનાર મહિલા અને તેના પ્રેમીના ચકચારી કેસનો ભેદ ઉકેલ્યો હતો. એ ઉપરાંત રાજકોટ એસીબીમાં પીઆઈ તરીકે ફરજ દરમિયાન તળાવ ગાળવાના કૌભાંડનો પર્દાફાશ કર્યેા હતો.
લાંબા સમયથી પીઆઈ બાદ ડીવાયએસપી તરીકે પણ એસીબી (એન્ટી કરપ્શન બ્યુરો)માં ફરજ બજાવતા કે.એચ.ગોહિલ ભુજ એસીબીના મદદનીશ નિયામક છે. હાલ રાજકોટનો ચાર્જ પણ તેમની પાસે છે. તાજેતરમાં જ ટીઆરપી ગેમઝોન અિકાંડમાં જેલમાં પુરાયેલા રાજકોટ મહાપાલિકાના પૂર્વ ટીપીઓ એમ.ડી.સાગઠિયાની ૨૮ કરોડથી વધુની અપ્રમાણસર મિલકતની તપાસ માટે એસીબીની પાંચ સભ્યોની રચાયેલી ખાસ સીટમાં પણ તેઓ છે. એસીબીના કાર્યકાળ દરમિયાન તેઓએ ઘણાખરા ભ્રષ્ટ્ર અધિકારીઓ, કર્મચારીઓને તેમજ તેમની રાહબરીમાં એસીબીની ટીમોએ અનેક સફળ ટ્રેપ કરી છે