રાજસ્થાનની રાજધાની જયપુરમાં આજે રાજકીય ગરમાવો જોવા મળ્યો હતો. શહેરના શહીદ સ્મારક પાસે આયોજિત એક વિરોધ પ્રદર્શન દરમિયાન 'કોકરોચ જનતા પાર્ટી' (CJP) ના સંસ્થાપક અભિજીત દીપકે પર અચાનક હુમલો કરવામાં આવ્યો હતો. NEET પેપર લીક અને બેરોજગારી જેવા ગંભીર મુદ્દાઓ પર અવાજ ઉઠાવવા પહોંચેલા દીપકેને એક યુવકે ભીડની વચ્ચે જ ઉપરાઉપરી અનેક થપ્પડ મારી દીધી હતી, જેના કારણે ઘટનાસ્થળે ભારે અફરાતફરી મચી ગઈ હતી.

View this post on Instagram

A post shared by Aajkaal (@aajkaaldaily)

મળતી માહિતી મુજબ, અભિજીત દીપકે શિક્ષણ વ્યવસ્થામાં સુધાર અને ભરતી પરીક્ષાઓમાં થઈ રહેલી ગેરરીતિઓ વિરુદ્ધ આયોજિત ધરણા પ્રદર્શનમાં સામેલ થવા પહોંચ્યા હતા. જ્યારે તેઓ પ્રદર્શન સ્થળે પહોંચ્યા ત્યારે ઉત્સાહિત સમર્થકોએ તેમને પોતાના ખભા પર ઉઠાવી લીધા હતા. આ ગીચતા અને નારાબાજીનો લાભ ઉઠાવીને ત્રણ યુવકો તેમની નજીક પહોંચ્યા હતા. તેમાંથી એક યુવકે અચાનક આગળ વધીને અભિજીત દીપકે પર હુમલો કર્યો અને તેમને એક પછી એક ઘણી થપ્પડ જડી દીધી. આ હુમલાનો વીડિયો સોશિયલ મીડિયા પર વાયરલ થયો છે.

સમર્થકોનો આક્રોશ અને પોલીસની કાર્યવાહી

પોતાના નેતા પર થયેલા હુમલાને જોઈને ત્યાં હાજર સમર્થકોમાં ભારે રોષ ફેલાયો હતો. રોષે ભરાયેલા સમર્થકોએ તુરંત જ તે યુવકને પકડી લીધો હતો અને તેને મેથીપાક ચખાડવાનું શરૂ કર્યું હતું. સ્થિતિ વધુ વણસે તે પહેલા ત્યાં તૈનાત પોલીસ જવાનોએ હસ્તક્ષેપ કર્યો હતો. પોલીસે હુમલો કરનાર યુવકને ગુસ્સે ભરાયેલા સમર્થકોની ચુંગાલમાંથી છોડાવી પોતાની કસ્ટડીમાં લીધો હતો અને વધુ પૂછપરછ માટે વિધાયકપુરી પોલીસ સ્ટેશને લઈ ગઈ હતી.​​​​​​​

પ્રદર્શનમાં અન્ય વિવાદો અને મોબાઈલ ચોરી

આશ્ચર્યની વાત એ છે કે થપ્પડ કાંડ પહેલા પણ પ્રદર્શન સ્થળ પર માહોલ તંગ હતો. નારાબાજી દરમિયાન કેટલાક જૂથો વચ્ચે બોલાચાલી થઈ હતી જે જોતજોતામાં ધક્કા-મુક્કીમાં ફેરવાઈ ગઈ હતી. પોલીસે સમયસૂચકતા વાપરીને એક યુવકની અટકાયત કરી પરિસ્થિતિ કાબૂમાં લીધી હતી. આ ઉપરાંત, ભીડનો ફાયદો ઉઠાવીને અસામાજિક તત્વોએ પ્રદર્શનકારીઓના મોબાઈલ ફોન પણ ચોર્યા હોવાની ફરિયાદો ઉઠી હતી. અનેક લોકોના ફોન ગાયબ થતા મંચ પરથી આયોજકોએ લોકોને પોતાના કિંમતી સામાન પ્રત્યે સાવધ રહેવાની અપીલ કરવી પડી હતી.

મુદ્દો: NEET પેપર લીક અને બેરોજગારી

કોકરોચ જનતા પાર્ટી દ્વારા આ આંદોલન મુખ્યત્વે દેશની કથળતી શિક્ષણ વ્યવસ્થા અને ખાસ કરીને NEET જેવી મહત્વની પરીક્ષાઓમાં પેપર લીકની ઘટનાઓ વિરુદ્ધ કરવામાં આવ્યું હતું. આ પ્રદર્શનમાં મોટી સંખ્યામાં વિદ્યાર્થીઓ, યુવાનો અને તેમના વાલીઓ જોડાયા હતા. અભિજીત દીપકે પર થયેલા હુમલા બાદ હવે આ મુદ્દો વધુ જોર પકડે તેવી શક્યતા છે. પોલીસ હાલ હુમલાખોરની ઓળખ અને તેના હુમલા પાછળના હેતુની તપાસ કરી રહી છે.