રાજકોટ : કાગદડી નજીક મિત્રને બાઈક અથડાવવા થયેલી માથાકૂટના સમાધાનમાં ગયેલા બેડી (વાચ્છકપર) ગામના યુવકને ચાર શખસોએ ધોકા વડે માર મારતા ઇજા થવાથી સારવાર માટે ખસેડવામાં આવ્યો હતો. બનાવ અંગે યુવકની ફરિયાદના પરથી કુવાડવા પોલીસે હરેશ નાગજીભાઈ હાડગરડા, અક્ષય મોતીભાઈ હાડગરડા, વિશાલ કમલેશભાઈ હાડગરડા, તુષાલ ઉર્ફે બુટો કમલેશભાઈ હાડગરડા (રહે-તમામ બેડી(વાચ્છકપર) સામે ગુનો નોંધ્યો છે. બનાવની પ્રાપ્ત વિગત મુજબ બેડી(વાચ્છકપર) ગામે રહેતો અને ડ્રાઇવીંગ કામ કરતો અજય નાનજીભાઈ ટોયટા (ઉ.વ.23)ને મિત્ર તુષાલનો ફોન આવ્યો હતો અને ફોનમાં જણાવ્યું હતું કે, મારે તારા માસીયાઈ કાનાભાઈ હાડગરડા સાથે વાહન ઓવરટેક કરવા બાબતે માથાકૂટ થઇ છે આથી તેનું સમાધાન કરવા માટે તું આવ, આથી યુવક બાઈક લઈને કાગદડી ગામ પાસે આવેલી કનૈયા હોટેલ પાસે પહોંચતા ત્યાં હાજર હરેશ, મોતી, વિશાલ, તુષાલ ઉર્ફે બુટોએ મળી ગાળાગાળી કરી ધોકા વડે હુમલો કરતા યુવકને ઇજા થઇ હતી, યુવકને વધુ મારથી બચાવવા માટે માસીયાઈ કાનાભાઇ, મોટોભાઈ ભરત અને વિજય સહિતના આવી જતા તેને પણ મારમાર્યો હતો. યુવકને 108 મારફતે સિવિલ હોસ્પિટલમાં ખસેડવામાં આવતા બનાવ અંગે હોસ્પિટલ ચોકીના સ્ટાફે કુવાડવા રોડ પોલીસને જાણ કરી હતી. જેના પગલે પોલીસે હોસ્પિટલ પહોંચી યુવકના નિવેદનના આધારે ચારેય શખ્સો સામે ગુનો નોંધી ઝડપી લેવા તજવીજ હાથ ધરી છે...