ઇન્સ્ટાગ્રામમાં ફેક આઇડી બનાવી ન્યુ સાગર સોસાયટીમાં રહેતા યુવાન અને તેની ગર્લફ્રેન્ડનો ફોટો તેમાં મુકી બીભત્સ શબ્દો લખતા આ અંગે યુવાને સાઇબર ક્રાઇમ પોલીસ સ્ટેશનમાં ફરિયાદ નોંધાવી છે.જેના આધારે પોલીસે આઇટી એકટ હેઠળ ગુનો નોંધી તપાસ હાથ ધરી છે.
બનાવની જાણવા મળતી વિગતો મુજબ,શહરેના કોઠારીયા રોડ પર ન્યુ સાગર સોસાયટી શેરી નં.૪ માં રહેતા ઇમિટેશનના કારીગર ઇમરાન યુનુસભાઇ ધાનાણી(ઉ.વ ૩૪) નામના યુવાને સાઇબર ક્રાઇમ પોલીસ સ્ટેશનમાં નોંધાવેલી ફરિયાદમાં જણાવ્યું હતું કે,તે ઇન્સ્ટાગ્રામ પર ઇમરાનકસીશ નામના આઇડીનો ઉપયોગ કરે છે.
જુન ૨૦૨૪ માં તેને માસીયાઇ ભાઇ ઇર્શાદ ડાંગસીયા(રહે. રાજકોટ) નો ફોન આવ્યો હતો અને કહ્યું હતું કે,મારી ઇન્સ્ટા. આઇડી પર અજાણી આઇડી ઇરફાન ૦૦૦૦ પરથી રિકવેસ્ટ આવી હતી જે આઇડીમાં તારો અને તારી ગર્લફ્રેન્ડનો ફોટો રાખેલ હતો.જેથી મેં રિકવેસ્ટ સ્વીકારતા તારો ફોટો પોસ્ટ કરી તેમાં બિભત્સ શબ્દો લખ્યા હતાં.જેથી યુવાને ચેક કરતા કોઇ શખસે ફેક આઇડી બનાવી તેમાં યુવાનની જાણ બહાર તેનો અને તેની ગર્લફ્રેન્ડનો ફોટો પ્રોફાઇલ એકાઉન્ટમાં રાખી તે ફોટો પોસ્ટ કરી તેમજ ફોરવર્ડ કર્યેા હતો.અને બિભત્સ શબ્દો લખ્યા હતાં.દરમિયાન યુવાનના કાકાના દિકરા ઇમ્તીયાઝે પણ કહ્યું હતું કે,આ ફેક આઇડીમાં યુવાન અને તેની ગર્લફ્રેન્ડનો ફોટો રાખી બિભત્સ શબ્દો લખ્યા છે.
આમ કોઇ અજાણી વ્યકિતીએ ઇન્સ્ટાગ્રામ પર ઇરફાન ૦૦૦૦ નામની ફેક આઇડી બનાવી યુવાન અને તેની ગર્લફ્રેન્ડનો ફોટો મુકી યુવાનના સંબંધીઓને આ ફોટો મોકલી બિભત્સ લખાણ લખ્યું હોય યુવાને આ અંગે સાઇબર ક્રાઇમ હેલ્પ લાઇનમાં અરજી કર્યા બાદ હવે આ બાબતે ફરિયાદ કરતા સાઇબર ક્રાઇમ પોલીસ સ્ટેશનમાં ફરિયાદ કરતા હેડ કોન્સ. દિપક પંડીતે આઇટી એકટ હેઠળ ગુનો દાખલ કર્યેા હતો.બનાવ અંગે વધુ તપાસ પીઆઇ કે.એસ.દેસાઇ ચલાવી રહ્યા છે.