લોધિકા તાલુકાના હરિપર તરવડામાં સામાન્ય અકસ્માત બાદ પરપ્રાંતીય શ્રમિક યુવાન પર ગામમાં જ રહેતા છ શખસો ધોકા અને લાકડી વડે તુટી પડયા હતાં.જેમાં યુવાનને માથામાં ભાગે ઇજા પહોંચી હતી તથા પગમાં ફ્રેકચર થઇ ગયું હતું. બનાવ અંગે યુવાનની ફરિયાદ પરથી લોધિકા પોલીસે આઠ શખસો સામે રાયોટીંગ સહિતની કલમ હેઠળ ગુનો નોંધી આરોપીઓને ઝડપી લેવા તપાસ હાથ ધરી છે.

આ બનાવની જાણવા મળતી વિગતો મુજબ, મૂળ યુપીનો વતની અને હાલ હરીપર તરવડા રોડ પર ચીભડા ગામ પાસે આવેલી એન્જલ ટયુબ કંપનીમાં કામ કરી અહીં કંપનીના જ રૂમમાં રહેતા શ્રમિક યુવાન અનુપકુમાર લાલજીભાઇ રાજભર(ઉ.વ ૨૭) દ્વારા લોધિકા પોલીસ મથકમાં નોંધવવામાં આવેલી ફરિયાદમાં આરોપી તરીકે હરીપર તરવડા ગામે રહેતા મહોબત મહેબુબ ઠેબા, અરમાન, રાહુલ રાજેશભાઇ સોલંકી, સાહિલ શબ્બીરભાઇ ઠેબા, અહેમદ યુનુશભાઇ શકરીયાણા, અમિત કરીમભાઇ ઠેબા તથા અન્ય બે અજાણ્યા શખસોના નામ આપ્યા છે.

યુવાને ફરિયાદમાં જણાવ્યું હતું કે, બુધવારે તેને રજા હોવાથી તે રાવકીમાં કામ કરનાર પીતરાઇ ભાઇને મળવા માટે ગયો હતો.બાદમાં સાંજના ઘરે પરત હતો ત્યારે હરીપર ગામ પહેલા ડાબી બાજુ આવેલી દરગાહ પાસે પહોંચતા હરીપર તરવડા મહેબુબ ઠેબા બાઇક લઇને સામેથી આવતા બંનેના વાહન વચ્ચે સામાન્ય ટક્કર થઇ હતી. બાદમાં સાત જેટલા અજાણ્યા શખસો અચાનક લાકડી અને ધોકા સાથે આવી યુવાન પર હુમલો કરી દીધો હતો.જેમાં યુવાનને માથાનાભાગે તથા પગના ભાગે લાકડી અને ધોકાના ઘા ફટકારી દીધા હતાં. જેથી યુવાન લોહીલુહાણ થઇ પડી ગયો હતો.બાદમાં આ શખસોએ ધમકી આપી હતી કે જો આ બાબતે પોલીસ ફરિયાદ કરીશ તો તને જીવતો નહીં રહેવા દઉં. બાદમાં આ શખસો અહીંથી જતા રહ્યા હતાં. ત્યાંથી કોઇએ યુવાનના શેઠને ફોન કરતા તેણે અહીંથી એક માણસ મોકલ્યો હતો.

ત્યારબાદ યુવાનને સારવાર માટે હોસ્પિટલ લઇ જતા તેને માથાના ભાગે બે ટાંકા આવ્યા હતાં.તથા પગમાં ફ્રેકચર થઇ ગયું હોવાનું માલુમ પડયું હતું. યુવાનની ફરિયાદ પરથી લોધિકા પોલીસે આરોપીઓ સામે રાયોટ,ધમકી સહિતની કલમ હેઠળ ગુનો નોંધી આરોપીઓને ઝડપી લેવા તપાસ હાથ ધરી છે.