ભાવનગર બાંદ્રા ટ્રેનમાં સોનગઢ આવી રહેલા મહિલાનું પર્સ કોઈ અજાણ્યો શખ્સ ઉઠાવી નાસી છૂટ્યો હતો. મુંબઈના કાંદીવલીમાં રહેતુ દંપતી ભાવનગર બાંદ્રા ટ્રેઈનમાં સોનગઢ આવી રહ્યુ હતું તે વેળાએ મહિલાએ સુતી વેળાએ તેના માથા નિચે રાખેલુ પર્સ જેમાં રોકડ અને મોબાઈલ રાખેલા હતા. જે કોઈ ચોરી કરી ગયું હોવાની પોલીસમાં ફરિયાદ નોંધાવી હતી.

આ બનાવ અંગે મળતી માહિતી અનુસાર ભાવનગર તરફ બાંદ્રા ટ્રેનમાં આવી રહેલા દંપત્તિની સાથે ટ્રેનમાં મુસાફરી દરમિયાન ચોરીની ઘટના બની હતી. મુંબઈના કાંદીવલી ઈસ્ટની પ્રણવવિધ્યા સોસાયટીમાં રહેતા ચેતનભાઈ કિશોરચંદ્ર શેઠે ધોળા રેલ્વે પોલીસ મથકમાં ફરિયાદ નોંધાવી હતી કે, ગઈકાલે તેઓ અને તેના પત્ની મનિષાબેન ભાવનગર-બ્રાંદ્રા ટ્રેનમાં રિઝર્વેશન કરવી સોનગઢ આવવા નિકળ્યા હતા. તે વેળાએ રાત્રીના તેઓના પત્ની બે મોબાઈલ અને રોકડ રાખેલ પર્સ તેના માથા નીચે મુકી સુઈ ગયા હતા. અને સવારે સાત કલાકના ધોળા રેલ્વે સ્ટેશન આવતા તેઓએ જાગીને જોયુ તો કોઈ શખ્સ માથા નિચે રાખેલુ બે મોબાઈલ અને રોકડ રૂા. પાંચ હજાર સાથેના પર્સની ચોરી કરી પલાયન થઈ ગયો હતો. જે બનાવ મામલે ધોળા પોલીસ મથકમાં ફરિયાદ નોંધાવતા પોલીસે અજાણ્યા શખ્સ સામે ગુનો નોંધી વધુ કાર્યવાહી હાથ ધરી હતી.